जिवती ग्रामीण रुग्णालयात चार मातांची सुखरूप सामान्य प्रसूती

चांदा ब्लास्ट प्रतिनिधी.संतोष इंद्राळे

जिवती : – तालुक्यातील विविध गावांतील चार मातांची गुरुवारी, २४ सप्टेंबर रोजी जिवती ग्रामीण रुग्णालयात सुखरूप सामान्य प्रसूती झाली. प्रसूतीनंतर सर्व माता व नवजात बाळांची प्रकृती स्थिर असून बाळांचे वजनही समाधानकारक असल्याची माहिती रुग्णालय प्रशासनाने दिली. ग्रामीण भागातील नागरिकांना स्थानिक पातळीवर दर्जेदार मातृ-बाल आरोग्यसेवा उपलब्ध होत असल्याचे या यशस्वी प्रसूतींमधून अधोरेखित झाले आहे.

येरवा येथील गंजूबाई देवराव सिडाम, अरुणा श्रीकांत नरवटे, मरकलमेठा येथील गवळण प्रमेश्वर गायकवाड तसेच मालगुंडा येथील अरुणा रमेश आडे या चार माता प्रसूतीसाठी जिवती ग्रामीण रुग्णालयात दाखल झाल्या होत्या. वैद्यकीय पथकाने आवश्यक तपासण्या करून प्रसूतीपूर्व काळजी घेतली.

त्यानंतर डॉक्टर व परिचारिकांच्या देखरेखीखाली चारही मातांची सामान्य प्रसूती यशस्वीरीत्या पार पडली.

या प्रसूतीदरम्यान डॉ. प्रेमय भगत, डॉ. विशाल पवार, डॉ. शेख मॅडम, राठोड परिचारिका आणि साक्षी परिचारिका यांनी समन्वयाने काम केले. प्रसूतीपूर्व, प्रसूतीदरम्यान तसेच प्रसूतीनंतर माता व नवजात बाळांना आवश्यक उपचार, मार्गदर्शन आणि देखभाल देण्यात आली.

ग्रामीण भागातील महिलांना प्रसूतीसाठी वेळेवर आणि सुरक्षित आरोग्यसेवा मिळणे अत्यंत महत्त्वाचे आहे. जिवती ग्रामीण रुग्णालयात एकाच दिवशी चार मातांची सुरक्षित सामान्य प्रसूती होणे हे रुग्णालयातील वैद्यकीय पथकाच्या तत्परतेचे आणि समन्वयाचे उदाहरण मानले जात आहे.

या यशामुळे तालुक्यातील नागरिकांचा जिवती ग्रामीण रुग्णालयातील मातृ-बाल आरोग्यसेवेवरील विश्वास अधिक दृढ होण्यास मदत झाली आहे. माता व बालकांच्या आरोग्यासाठी रुग्णालयातील वैद्यकीय पथक सातत्याने तत्पर असल्याचे या घटनेतून दिसून आले.