नेवजाबाई भैया हितकारिणी गणेश मंडळाकडून भक्तीचा जागर!

चांदा ब्लास्ट प्रतिनिधी. नंदू गुद्देवार

ब्रह्मपुरी :_ महाराष्ट्राच्या रांगड्या मराठमोळ्या संस्कृतीतील अनन्यसाधारण सण असलेल्या गणेशोत्सवाचा मंगलमय उत्साह सध्या गगनात मावेनासा झाला आहे. १४ सप्टेंबर २०२६, सोमवारी भाद्रपद शुद्ध चतुर्थीच्या शुभमुहूर्तावर बुद्धी, समृद्धी आणि सौभाग्याची देवता असलेल्या विघ्नहर्त्या गणरायाचे ढोल-ताशांच्या गजरात अत्यंत थाटामाटात आगमन झाले. संपूर्ण ब्रह्मपुरी नगरी ‘गणपती बाप्पा मोरया’च्या जयघोषाने आणि गणेशगीतांच्या सुरांनी दुमदुमून गेली आहे. याच भक्तिमय वातावरणात ब्रह्मपुरीतील प्रसिद्ध नेवजाबाई भैया हितकारिणी सार्वजनिक गणेश मंडळाने आपल्या अद्वितीय परंपरेचा आणि निस्सीम भक्तीचा वारसा पुन्हा एकदा अधोरेखित केला आहे.

          सकाळी १०.४५ च्या शुभमुहूर्तावर नेवजाबाई भैया हितकारिणी मंडळाच्या भव्य मंडपात श्रींच्या मूर्तीची प्राणप्रतिष्ठापना अत्यंत भावपूर्ण वातावरणात पार पडली. मंडळाचे संचालक नंदू शर्मा व त्यांच्या पत्नीच्या शुभहस्ते बाप्पाची पूजा-अर्चा करून मूर्ती विराजमान करण्यात आली. नेवजाबाई भैया हितकारिणी सार्वजनिक गणेश मंडळाचे अध्यक्ष अशोक भैया, माजी नगरसेवक तथा प्रसिद्ध उद्योजक गौरव भैया यांच्यासह मंडळाचे पदाधिकारी व कार्यकर्ते मोठ्या संख्येने उपस्थित होते.

          नेवजाबाई भैया हितकारिणी सार्वजनिक गणेशोत्सव मंडळ हे केवळ आकर्षक गणेशमूर्तीसाठीच नव्हे, तर आपल्या शिस्तबद्ध आणि वैचारिक उपक्रमांसाठी संपूर्ण परिसरात प्रसिद्ध आहे. यंदाही मंडळाच्या कार्यकर्त्यांनी दिवसरात्र एक करून देखाव्यांची तयारी केली आहे. केवळ उत्सव साजरा न करता त्यातून समाजप्रबोधन साधणे, ही या मंडळाची खरी ताकद आहे. मूर्तीचे पावित्र्य आणि उत्सवाचे मंगलत्व अबाधित राखण्यासाठी मंडळाचे पदाधिकारी व कार्यकर्ते पूर्ण तत्परतेने कार्यरत आहेत. तरुणाईला भक्तीच्या आणि चांगल्या विचारांच्या प्रवाहात आणण्याचे मोठे काम हे मंडळ सातत्याने करत आले आहे.

          यंदा या मंडळाने शिक्षण संस्थेच्या अथांग परिसरात भव्य ‘आनंद मेळाव्याचे’ आयोजन केले आहे. मनोरंजनाची उत्तम साधने आणि ईश्वरभक्तीचा सुंदर मिलाफ साधल्यामुळे या मंडपाला भेट देण्यासाठी भाविकांची मोठी पावले वळत आहेत. चाकरमानी मंडळीही या सोहळ्याचा आनंद घेण्यासाठी आवर्जून गावात दाखल झाली आहेत. बाप्पाची पहिली छबी कॅमेऱ्यात टिपण्यासाठी आणि बाप्पांसोबत सेल्फी काढण्यासाठी तरुण-तरुणींची मंडपात मोठी झुंबड उडत आहे.

लहान मुलांपासून ते वयोवृद्धांपर्यंत सर्वांचाच उत्साह द्विगुणीत झाला आहे. गेल्या महिनाभरापासून सुरू असलेली कार्यकर्त्यांची मेहनत आज खऱ्या अर्थाने फळाला आली आहे. भक्तिभाव, सामाजिक भान आणि भव्यतेचा सुरेख संगम साधत नेवजाबाई भैया हितकारिणी सार्वजनिक गणेश मंडळाने ब्रह्मपुरीकरांचे मन जिंकले आहे, यात तिळमात्र शंका नाही.