खाकीची नजर अन् तस्करांची फजिती! वर्ध्यात पहाटेच्या सुमारास १५ लाखांची अवैध दारू जप्त

चांदा ब्लास्ट प्रतिनिधी. अविनाश नागदेवे

वर्धा शहर पोलिसांनी अवैध व्यवसायांविरुद्ध आपली धडक मोहीम तीव्र केली असून, आज पहाटेच्या सुमारास नागसेन नगर, नालवाडी परिसरात एका मोठ्या तस्करीचा पर्दाफाश केला. दोन आलिशान कारमधून होणारी विदेशी दारूची वाहतूक पोलिसांनी अत्यंत चातुर्याने आणि धाडसाने रोखली. या कारवाईत एकूण १५ लाख ३४ हजार ४०० रुपयांचा मुद्देमाल जप्त करण्यात आला आहे. गोपनीय माहिती आणि सापळा५ मे २०२६ च्या पहाटे, पोलीस उपनिरीक्षक विशाल सवाई आणि त्यांचे पथक शहरात नाईट गस्त घालत होते.

यावेळी मुखबिराकडून खात्रीशीर माहिती मिळाली की, दोन पांढऱ्या रंगाच्या स्विफ्ट कारमधून मोठ्या प्रमाणात विदेशी दारूची खेप शहरात शिरणार आहे. माहिती मिळताच क्षणाचाही विलंब न लावता, पोलीस निरीक्षक संतोष ताले यांच्या मार्गदर्शनात पथकाने नागसेन नगर भागात नाकेबंदी केली. असा झाला थरार…पहाटे ४ वाजताच्या सुमारास समोरून दोन पांढऱ्या कार येताना दिसल्या. पोलिसांनी त्यांना थांबवण्याचा प्रयत्न केला असता, तस्करांनी गाड्या पळवण्याचा प्रयत्न केला. मात्र, पीएसआय विशाल सवाई आणि त्यांच्या पथकाने खासगी वाहनांच्या मदतीने दोन्ही कारचा पाठलाग करून त्यांना घेराव घातला आणि चालकांना ताब्यात घेतले. झडतीत काय मिळाले?दोन्ही वाहनांची (स्विफ्ट VDI क्र. MH 32 AX 1022 आणि स्विफ्ट डिझायर क्र. MH 32 AH 5350) पंचासमक्ष झडती घेतली असता, पोलिसांना धक्काच बसला. कारच्या डिक्कीत आणि सीटवर खालील माल मिळून आला: विदेशी दारू: ऑफिसर चॉईस, बॉम्बे व्हिस्की, मॅझिक मोमेंट व्होडका आणि बडवायझर बिअरच्या एकूण ३१ पेट्या (किंमत ४,३४,४००/- रुपये). वाहने: तस्करीसाठी वापरलेल्या दोन स्विफ्ट कार (किंमत ११,००,०००/- रुपये). एकूण मुद्देमाल: १५,३४,४००/- रुपये. आरोपी आणि पुढील कारवाईया प्रकरणी सुमीत मनोज पाला (२५), गणेश विजय भाट (२१) आणि प्रद्युम राजन सेन (२६) या तिघांना अटक करण्यात आली आहे. ही दारू मध्य प्रदेशातील सालबर्डी येथून आणल्याचे आरोपींनी प्राथमिक चौकशीत सांगितले आहे. आरोपींविरुद्ध महाराष्ट्र दारूबंदी कायदा आणि मोटर वाहन कायद्याच्या विविध कलमान्वये (कलम ६५, ७७, ९८, ८३ सह मोटर वाहन कायदा ३, १८१, १३०, १७७) गुन्हा दाखल करण्यात आला आहे. यांनी केली:

ही कारवाई पोलीस अधीक्षक सौरव कुमार अग्रवाल, अपर पोलीस अधीक्षक सदाशिव वाघमारे, उपविभागीय पोलीस अधिकारी प्रमोद मकेश्वर यांच्या मार्गदर्शनाखाली, पोलीस निरीक्षक संतोष ताले यांच्या देखरेखीखाली PSI विशाल सवाई व त्यांचे पथक पोलीस हवालदार विवेक बनसोड, पोलीस शिपाई महेंद्र डेकाटे,अमोल ढोबाळे, शिवदास डोईफोडे आणि रंजित भुरसे यांनी पार पाडली

नागरिकांकडून कौतुक

वर्धा शहर पोलिसांच्या या धडाकेबाज कारवाईमुळे अवैध दारू तस्करांमध्ये खळबळ उडाली असून, नागरिकांनी पोलिसांच्या तत्परतेचे आणि धाडसाचे कौतुक केले आहे झ