उसगाव १७ नंबर गेटवर ‘सुक्या नशा’चा विळखा

चांदा ब्लास्ट

घुग्घुस, चंद्रपूर : उसगाव येथील १७ नंबर गेट परिसरात सध्या चिंताजनक परिस्थिती निर्माण झाली आहे. एका बाजूला स्टील प्लांटच्या विस्ताराचे काम युद्धपातळीवर सुरू असून मोठ्या प्रमाणात परप्रांतीय कामगार येथे दाखल झाले आहेत, तर दुसऱ्या बाजूला ‘सुक्या नशा’चे वाढते प्रमाण त्यांच्या जीवनासाठी अभिशाप ठरत आहे.

स्थानिक पातळीवर अशी चर्चा आहे की या परिसरात गांजासारख्या अमली पदार्थांचा वापर झपाट्याने वाढत आहे. अनेक तरुण उघडपणे नशेच्या अवस्थेत फिरताना दिसत आहेत. यामुळे कायदा व सुव्यवस्थेवर प्रश्नचिन्ह निर्माण झाले असून कोणतीही मोठी दुर्घटना घडण्याची भीती व्यक्त केली जात आहे.

सर्वात मोठा प्रश्न असा उपस्थित होत आहे की घुग्घुस पोलिस व गुप्तचर यंत्रणेकडून येथे वास्तव्यास असलेल्या कामगारांची पोलिस पडताळणी करण्यात आली आहे का? या परिसरात किती कामगार व त्यांच्या कुटुंबीयांचे वास्तव्य आहे, याची अधिकृत माहिती अद्याप समोर आलेली नाही.

तसेच पोलिस पाटील, आजी-माजी ग्रामपंचायत सरपंच, सदस्य, जिल्हा परिषद व पंचायत समिती सदस्य तसेच कृषी उत्पन्न बाजार समिती सदस्य यांच्या भूमिकेवरही संशय व्यक्त केला जात आहे. या वाढत्या बेकायदेशीर व्यवसायाची माहिती त्यांना नाही का, की जाणूनबुजून दुर्लक्ष केले जात आहे, असा सवाल उपस्थित केला जात आहे.

परिसरात काही असामाजिक घटक उघडपणे गांजाचा पुरवठा करत असल्याची चर्चा असूनही त्यांच्यावर अद्याप ठोस कारवाई झालेली नाही. घुग्घुसच्या डीबी पथकावरही प्रश्नचिन्ह उपस्थित होत आहे की हा बेकायदेशीर नशेचा व्यवसाय किती काळ सुरू राहणार?

स्थानिक पोलिस या जाळ्याचा बंदोबस्त करण्यात सक्षम आहेत का, की चंद्रपूरच्या एलसीबी (लोकल क्राईम ब्रांच) ला हस्तक्षेप करावा लागणार, याकडे सर्वांचे लक्ष लागले आहे.

कामगारांची सुरक्षा, स्थानिक नागरिकांची शांतता आणि कायदा-सुव्यवस्थेची प्रतिमा—ही तिन्ही सध्या धोक्यात आली आहेत. वेळेत कठोर पावले उचलली नाहीत, तर उसगाव परिसर भविष्यात मोठ्या दुर्घटनेचे केंद्र ठरू शकतो.

आता सर्वांच्या नजरा प्रशासन व पोलिसांच्या पुढील कारवाईकडे लागल्या आहेत—या बेकायदेशीर नशेच्या जाळ्यावर आळा बसणार की हा मुद्दा इतर प्रकरणांप्रमाणेच कागदपत्रांतच दडपला जाणार?