मातृतीर्थ सिंदखेडराजाच्या पर्यटन विकासासाठी आमदार मनोज कायंदे यांचा मंत्रालयात पाठपुरावा; विकास आराखड्याला गती
जिजाऊ जन्मभूमीचा ऐतिहासिक वारसा जागतिक पर्यटनाच्या नकाशावर आणण्यासाठी आमदार कायंदे सक्रिय; मंत्रालयात महत्त्वपूर्ण बैठक

चांदा ब्लास्ट प्रतिनिधी. प्रा. अशोक डोईफोडे
देऊळगाव राजा : राजमाता जिजाऊ माँसाहेब यांची जन्मभूमी असलेल्या मातृतीर्थ सिंदखेडराजाचा पर्यटन विकास साधण्यासाठी आमदार मनोजभाऊ कायंदे यांनी मंत्रालयीन स्तरावर पाठपुरावा सुरू ठेवला आहे. याच अनुषंगाने मुंबई येथील मंत्रालयात पर्यटन राज्यमंत्री इंद्रनील नाईक यांच्या अध्यक्षतेखाली आणि आमदार मनोज कायंदे यांच्या उपस्थितीत सिंदखेडराजा विकास आराखड्यासंदर्भात महत्त्वपूर्ण बैठक पार पडली. या बैठकीत सिंदखेडराजातील ऐतिहासिक वारशाचे जतन, पर्यटकांसाठी आधुनिक सुविधा आणि पर्यटनाच्या पायाभूत विकासासंदर्भात विविध प्रस्तावांवर सविस्तर चर्चा करण्यात आली.
कायंदेंच्या उपस्थितीत विकास आराखड्याचा आढावा
या बैठकीला पर्यटन विभागाचे प्रधान सचिव संजय जाधव, महाराष्ट्र पर्यटन विकास महामंडळाचे व्यवस्थापकीय संचालक नीलेश गटणे तसेच महामंडळाचे आणि संबंधित विभागांचे वरिष्ठ अधिकारी उपस्थित होते.
आमदार मनोज कायंदे यांनी सिंदखेडराजाच्या ऐतिहासिक आणि सांस्कृतिक महत्त्वाच्या पार्श्वभूमीवर पर्यटन विकासासाठी आवश्यक असलेल्या बाबी बैठकीत मांडल्या. राजमाता जिजाऊ माँसाहेब यांच्या जन्मभूमीला भेट देणाऱ्या पर्यटकांना आवश्यक सुविधा उपलब्ध करून देण्यासोबतच ऐतिहासिक स्थळांचा नियोजनबद्ध विकास करण्याची गरज यावेळी अधोरेखित करण्यात आली.
पर्यटक निवासापासून अभ्यागत सुविधा केंद्रापर्यंत नियोजन
बैठकीत महाराष्ट्र पर्यटन विकास महामंडळाच्या माध्यमातून सिंदखेडराजा येथे नवीन पर्यटक निवास उभारण्याचा प्रस्ताव चर्चेला आला. यासोबतच पर्यटकांसाठी अभ्यागत सुविधा केंद्र विकसित करणे, समृद्धी महामार्गावर सिंदखेडराजाकडे जाण्यासाठी दिशादर्शक फलक आणि ऐतिहासिक स्थळांची माहिती देणारे माहितीफलक उभारणे, तसेच पर्यटकांसाठी आवश्यक पायाभूत सुविधा निर्माण करण्याबाबत चर्चा करण्यात आली.
राजमाता जिजाऊ माँसाहेब यांचे जन्मस्थळ आणि परिसरातील ऐतिहासिक स्मारकांचा पर्यटनाच्या दृष्टीने विकास करण्यावरही विशेष भर देण्यात आला. या माध्यमातून सिंदखेडराजाला भेट देणाऱ्या पर्यटकांना ऐतिहासिक वारशाची माहिती मिळण्यासोबतच पर्यटनाचा अनुभव अधिक सुविधाजनक करण्याचे नियोजन आहे.
पर्यटन राज्यमंत्र्यांचे तातडीने कार्यवाहीचे निर्देश
बैठकीत झालेल्या चर्चेनंतर पर्यटन राज्यमंत्री इंद्रनील नाईक यांनी प्रस्तावित कामांच्या अनुषंगाने महाराष्ट्र पर्यटन विकास महामंडळाने तातडीने कार्यवाही सुरू करण्याचे निर्देश दिले. तसेच महामंडळाच्या वरिष्ठ अधिकाऱ्यांसह लवकरच सिंदखेडराजाला प्रत्यक्ष भेट देऊन प्रस्तावित विकासकामांच्या ठिकाणांची पाहणी करण्याचेही निर्देश देण्यात आले.
या स्थळपाहणीमुळे प्रस्तावित कामांची प्रत्यक्ष परिस्थिती, उपलब्ध जागा आणि आवश्यक सुविधांचा आढावा घेऊन पुढील नियोजन करण्याचा मार्ग मोकळा होणार आहे.
जिजाऊ जन्मभूमीला पर्यटनाच्या नकाशावर महत्त्वाचे स्थान मिळवून देण्याचा प्रयत्न
मातृतीर्थ सिंदखेडराजा हे केवळ ऐतिहासिक स्थळ नसून महाराष्ट्राच्या सांस्कृतिक आणि ऐतिहासिक अस्मितेचे महत्त्वपूर्ण केंद्र आहे. राजमाता जिजाऊ माँसाहेब यांच्या जन्मभूमीचा ऐतिहासिक वारसा जपत येथे पर्यटनाच्या दृष्टीने आवश्यक सुविधा निर्माण झाल्यास इतिहासप्रेमी, पर्यटक आणि भाविकांची संख्या वाढण्यास मदत होऊ शकते.
सिंदखेडराजाला राज्याच्या पर्यटन नकाशावर महत्त्वपूर्ण स्थान मिळवून देण्यासाठी विकास आराखडा महत्त्वाचा ठरणार असल्याचे मत आमदार मनोजभाऊ कायंदे यांनी व्यक्त केले. या विकासकामांसाठी आपला सातत्याने पाठपुरावा सुरू असून, पर्यटन विभागाच्या माध्यमातून प्रस्तावित कामांना गती मिळावी, अशी भूमिका त्यांनी मांडली.
मंत्रालयातील या बैठकीमुळे मातृतीर्थ सिंदखेडराजाच्या पर्यटन विकासाच्या प्रस्तावांना प्रशासकीय स्तरावर पुढे नेण्याच्या दृष्टीने महत्त्वपूर्ण पाऊल पडले आहे. आता महामंडळाच्या अधिकाऱ्यांच्या प्रत्यक्ष स्थळपाहणीनंतर या विकास आराखड्याला कितपत गती मिळते, याकडे सिंदखेडराजा विधानसभा मतदारसंघातील नागरिकांचे लक्ष लागले आहे..



