योग सुवर्णपदक विजेत्या पूजा देऊळकरांच्या कथित अपमानाची चौकशी करा

चांदा ब्लास्ट प्रतिनिधी. अतुल कोल्हे

        आंतरराष्ट्रीय स्तरावरील योगासन स्पर्धेत भारताचे प्रतिनिधित्व करून सुवर्णपदक मिळविणाऱ्या भद्रावतीच्या योग शिक्षिका डॉ. पूजा देऊळकर यांच्याशी भद्रावती नगरपरिषद कार्यालयात कथितरीत्या गैरवर्तन झाल्याचा आरोप करण्यात आला आहे. या प्रकरणाची तातडीने निष्पक्ष चौकशी करून वस्तुस्थिती स्पष्ट करावी, अशी मागणी सोमवारी आयोजित पत्रकार परिषदेत करण्यात आली.

पत्रपरिषदेत देण्यात आलेल्या माहितीनुसार, दि. २२ सप्टेंबर रोजी ‘सेवा संकल्प अभियान’ अंतर्गत आयोजित करण्यात येणाऱ्या योग व ध्यान सत्रासाठी स्थानिक पातळीवर आंतरराष्ट्रीय कामगिरी केलेल्या डॉ. देऊळकर यांना सहभागी करून न घेता इतर तालुक्यातील व्यक्तींना अधिकृतरीत्या संधी देण्यात आल्याचा दावा करण्यात आला. या संदर्भात माहिती घेण्यासाठी डॉ. देऊळकर दि. २१ सप्टेंबर रोजी दुपारी १२.३० ते १२.५० या वेळेत नगरपरिषद कार्यालयात गेल्या होत्या.

पत्रपरिषदेत सांगण्यात आले की, मुख्याधिकारी विशाखा शेरकी यांच्या कक्षात झालेल्या भेटीदरम्यान डॉ. देऊळकर यांचे म्हणणे पूर्णपणे ऐकून घेण्यात आले नसल्याचे तसेच त्यांच्याशी सन्मानपूर्वक संवाद साधला गेला नसल्याचे त्यांचे म्हणणे आहे. त्यांना कक्षाबाहेर जाण्यास सांगण्यात आल्याचाही दावा करण्यात आला. मात्र, या घटनेची अधिकृत वस्तुस्थिती निष्पक्ष चौकशीनंतरच स्पष्ट होऊ शकते, असेही पत्रकार परिषदेत स्पष्ट करण्यात आले.

या प्रकरणी नगरपरिषद कार्यालयातील संबंधित वेळेचे CCTV फुटेज तातडीने सुरक्षित ठेवून त्याची तपासणी करावी, डॉ. पूजा देऊळकर यांच्यासह संबंधित अधिकारी व कर्मचाऱ्यांचे म्हणणे नोंदवावे आणि चौकशीअंती गैरवर्तन झाल्याचे निष्पन्न झाल्यास संबंधितांवर नियमानुसार प्रशासकीय कार्यवाही करावी, अशी मागणी करण्यात आली.

तसेच डॉ. पूजा देऊळकर यांच्या आंतरराष्ट्रीय योग क्षेत्रातील कामगिरीची नगरपरिषदेने अधिकृत दखल घेऊन त्यांचा योग्य सन्मान करावा, तसेच दि. २२ सप्टेंबरच्या योग व ध्यान सत्रासाठी स्थानिक पदकविजेत्या योग शिक्षिकेला संधी न देण्यामागील निकष, निर्णयप्रक्रिया व कारणे प्रशासनाने स्पष्ट करावीत, अशी मागणीही करण्यात आली.

पत्रपरिषदेत पुढे सांगण्यात आले की, प्रशासनाने या प्रकरणाची तातडीने चौकशी करून योग्य कार्यवाही केली नाही, तर नागरिक, योगप्रेमी, क्रीडा क्षेत्रातील व्यक्ती आणि सामाजिक कार्यकर्त्यांच्या माध्यमातून लोकशाही व कायदेशीर मार्गाने निदर्शने, धरणे आंदोलन तसेच वरिष्ठ प्रशासकीय अधिकाऱ्यांकडे तक्रार करण्यात येईल.

दरम्यान, या प्रकरणासंदर्भात नगरपरिषद प्रशासनाची अधिकृत भूमिका अद्याप समोर आलेली नसून, चौकशीअंतीच घटनेची नेमकी वस्तुस्थिती स्पष्ट होणार आहे.

या पत्रपरिषदेत डॉ. पूजा देऊळकर किशोरी कटलावार, शुभांगी झाडे, पुरुषोत्तम नैताम, प्रकाश कटलावर, विशाल गावंडे, दीपक निकोडे आदी उपस्थित होते.