मारेगांवच्या हेमंत भुजाडेची CAPF परिक्षेत देशात 276 वी झेप

चांदा ब्लास्ट

चंद्रपूर/यवतमाळ :- प्रतिकूल आर्थिक परिस्थिती, अडचणी आणि संघर्षावर जिद्द, मेहनत व आत्मविश्वासाच्या बळावर मात करत मारेगांव येथील हेमंत लता शंकर भुजाडे याने केंद्रीय गृह मंत्रालयाच्या अंतर्गत घेण्यात येणाऱ्या CAPF परिक्षेत देशात 276 वा क्रमांक मिळवत असिस्टंट कमांडंट पदावर मजल मारली आहे. हेमंतच्या या यशाची दखल घेत पूर्व केंद्रीय गृह राज्यमंत्री हंसराज अहीर यांनी पदाधिकारी व कार्यकर्त्यांसह त्याच्या घरी जाऊन भेट घेतली.

 यावेळी हंसराज अहीर यांच्या हस्ते हेमंतचा शाल व श्रीफळ देऊन सत्कार करण्यात आला. त्याचा कुटुंबीयांचे अभिनंदन करून देशसेवेच्या नव्या जबाबदारीसाठी हेमंतला पुढील वाटचालीस शुभेच्छा देण्यात आल्या.

हेमंतच्या यशाचे कौतुक करत हंसराज अहीर यांनी म्हटले की, प्रतिकुल परिस्थितीवर मात करून हेमंतने मिळविलेले यश हे त्याच्या जिद्दीचे, मेहनतीचे आणि आत्मविश्वासाचे फलित आहे. ग्रामीण भागातील विद्यार्थ्यांमध्ये प्रचंड गुणवत्ता असून, योग्य संधी आणि मार्गदर्शन मिळाल्यास ते राष्ट्रीय स्तरावर उल्लेखनीय कामगिरी करून शकतात.

देशाच्या सुरक्षेची जबाबदारी स्वीकारण्याची संधी मिळणे ही अभिमानाची बाब असल्याचे सांगत अहीर यांनी हेमंतला पुढील वाटचालीस शुभेच्छा दिल्या. हेमंतने आपल्या कर्तृत्वातून मारेगांवचे नाव देशपातळीवर पोहोचविले आहे. त्याचा आदर्श घेऊन परिसरातील युवकांनी स्पर्धा परिक्षांकडे सकारात्मक दृश्टीकोनातून पाहावे, असे आवाहनही हंसराज अहीर यांनी केले. यावेळी दिनकर पावडे, अविनाश लांबट, प्रशांत नांदे, अनुप महाकुलकर, भाजपा पदाधिकारी, कार्यकर्ते व मारेगांव येथील नागरिकांची उपस्थिती होती.