अंगणवाडी सेविका 4 डिसेंबर पासून संपावर

चांदा ब्लास्ट प्रतिनिधी. प्रा. शेखर प्यारमवार

   मानधन नको, वेतन हवे, या मागणीबाबत अनेक वर्षांपासून अंगणवाडी सेविका व मदतनीसांचा लढा सुरू आहे. मात्र, सरकारने त्याकडे दुर्लक्ष केल्याने ०४ डिसेंबरपासून अंगणवाडी सेविका व मदतनीस संपावर असून मागील पाच दिवसांपासून महाराष्ट्रसह सावली तालुक्यातील अंगणवाडीत लहान लेकरांचा किलबिलाट बंद पाहायला मिळत आहे.तसे निवेदन एकात्मिक बालविकास प्रकल्प कार्यालयाला देण्यात आले आहे.

      तालुक्यातील अंगणवाडी सेविका व मदतनीसांनी गुरुवारी तहसील कार्यालयाच्यासमोर ठिय्या मांडला. व आंदोलनाच्या दुसऱ्या दिवशी शुक्रवारला आंदोलकानी तहसील कार्यालयापासून तर पंचायत समितीपर्यंत पायदळ मोर्चा काढण्यात आला. या वेळी अंगणवाडी सेविका व मदतनीस कर्मचारी युनियनच्या सावली तालुकाध्यक्ष चंद्रकला सहारे यांनी जोपर्यंत मागण्यांची सरकार दखल घेत नाही, तोपर्यंत संप सुरूच ठेवणार असल्याचे सांगत मागण्यांसाठी एकजूट कायम ठेवून हक्कासाठी एकत्र येण्याचे आवाहन केले.

   राज्यातील अंगणवाडी कर्मचार्‍यांना शासकीय कर्मचार्‍यांचा दर्जा द्या, सन्मानजनक वेतनवाढ,जुनी पेन्शन यासह विविध मागण्यांची सोडवणूक करण्यासाठी राज्यभर आंदोलने सुरू आहेत. राज्य शासन व प्रशासनाशी वारंवार चर्चा करण्यात आली. परंतु मागण्यांची दखल घेण्यात आली नाही. त्यामुळे राज्य अंगणवाडी कर्मचारी कृती समितीने 4 डिसेंबरपासून राज्यभर बेमुदत संप जाहीर केला आहे. चालू महिन्यातील कुठलीही माहिती, अहवाल देणे, तसेच मासिक बैठकीवर बहिष्कार टाकण्याचा निर्णय कृती समितीचे घेतला आहे.

   आज या संपाचे निवेदन सावलीचे तहसीलदार व पंचायत समितीचे बालविकास अधिकारी यांना देण्यात आले या वेळेस युनियनचे अध्यक्ष चंद्रकला सहारे, उपाध्यक्ष प्रज्ञा दुधे,सचिव अर्चना पाल,अर्चना इंदुरकर, तीलोत्तमा कोरडे,रंजिता दहेलकर,कांचन संतोषवार,विमल इमलवार,व तालुक्यातील सर्व अंगणवाडी सेविका व मदतनीस यांच्या उपस्थितीत निवेदन दिले.