चंद्रपूर जिल्हा उपाध्यक्षपदी संदीप पौरकर यांची नियुक्ती

चांदा ब्लास्ट प्रतिनिधी. राजेश डोंगरे

गोंडपिपरी :_ राष्ट्रीय अनुसूचित जाती-जनजाती विकास परिषद, नवी दिल्लीच्या महाराष्ट्र प्रदेश कार्यकारिणीत चंद्रपूर जिल्ह्याच्या उपाध्यक्षपदी संदीप जनार्दन पौरकर यांची नियुक्ती करण्यात आली आहे. याबाबतचे नियुक्तीपत्र परिषदेचे महाराष्ट्र प्रदेशाध्यक्ष डॉ. नरेंद्र विश्वनाथ उंदिरवाडे यांच्या स्वाक्षरीने दिनांक २२ सप्टेंबर २०२६ रोजी जारी करण्यात आले आहे.

नियुक्तीपत्रात नमूद केल्यानुसार, सामाजिक कार्यातील केलेली कामे तसेच विशेष योगदानाची दखल घेत राष्ट्रीय अध्यक्ष प्रविणजी मांगिरीया यांच्या सहमतीने व महाराष्ट्र प्रदेशाध्यक्ष डॉ. नरेंद्र विश्वनाथ उंदिरवाडे यांच्या शिफारशीनुसार राष्ट्रीय कोअर कमिटीने संदीप जनार्दन पौरकर यांची ‘जिल्हा उपाध्यक्ष, जि. चंद्रपूर’ या पदावर नियुक्ती केली आहे.

या नियुक्तीमुळे चंद्रपूर जिल्ह्यातील अनुसूचित जाती-जमाती तसेच वंचित घटकांच्या प्रश्नांना संघटनात्मक पातळीवर मांडण्यासाठी पौरकर यांना जबाबदारी मिळाली आहे. सामाजिक क्षेत्रात काम करताना विविध प्रश्न, समस्या आणि गरजा प्रशासनापर्यंत पोहोचविण्यासाठी तसेच संबंधित घटकांना न्याय मिळवून देण्यासाठी संघटनेच्या माध्यमातून प्रयत्न करण्याची अपेक्षा या नियुक्तीतून व्यक्त करण्यात आली आहे.

नियुक्तीपत्रात संघटनेच्या उद्दिष्टांप्रती कर्तव्यनिष्ठेने व जबाबदारीने कार्य करण्याचे आवाहन करण्यात आले आहे. त्यामुळे आगामी काळात चंद्रपूर जिल्ह्यात संघटनेच्या कार्याचा विस्तार करण्याबरोबरच सामाजिक उपक्रमांना चालना देण्याची जबाबदारी पौरकर यांच्यावर राहणार आहे.

या नियुक्तीबद्दल राष्ट्रीय अध्यक्ष, संरक्षक, राष्ट्रीय समन्वयक तसेच महाराष्ट्र प्रदेश कार्यकारिणीतील पदाधिकाऱ्यांकडून पौरकर यांचे अभिनंदन करण्यात आले. नियुक्तीची माहिती समोर आल्यानंतर त्यांच्या समर्थक व सामाजिक क्षेत्रातील सहकाऱ्यांकडूनही शुभेच्छांचा वर्षाव होत आहे.