गणराया अवॉर्ड 2026 अंतर्गत देवळीत आरोग्य शिबिराचे आयोजन

चांदा ब्लास्ट प्रतिनिधी. अविनाश नागदेवे

 गणेशोत्सवाच्या निमित्ताने ‘गणराया अवॉर्ड 2026’ या उपक्रमांतर्गत नागरिकांच्या आरोग्याची काळजी घेणे, आरोग्यविषयक जनजागृती करणे व सामाजिक बांधिलकी जपणे या उद्देशाने पोलीस स्टेशन देवळी व श्री. बाल गणेश मित्र मंडळ समिती देवळी यांच्या संयुक्त विद्यमाने आज आरोग्य शिबिराचे आयोजन करण्यात आले.

सदर आरोग्य शिबिरासाठी शालिनीताई मेघे हॉस्पिटल, सावंगी (मेघे) येथून 7 विविध वैद्यकीय विभागांतील तज्ञ डॉक्टरांचे वैद्यकीय पथक उपस्थित झाले होते. या वैद्यकीय पथकाच्या माध्यमातून नागरिकांची आरोग्य तपासणी करून आवश्यक वैद्यकीय सल्ला व मार्गदर्शन देण्यात आले.

आरोग्य शिबिरामध्ये नेत्ररोग तज्ञ, नाक-कान-घसा तज्ञ, त्वचारोग तज्ञ, मेडिसिन तज्ञ, हाडांचे विकार तज्ञ, बालरोग तज्ञ व स्त्रीरोग तज्ञ अशा विविध वैद्यकीय विभागांतील तज्ञ वैद्यकीय अधिकाऱ्यांनी नागरिकांना आरोग्य सेवा दिली.

सदर आरोग्य शिबिराचा एकूण 150 नागरिकांनी लाभ घेतला.विविध वैद्यकीय विभागांतील तज्ञ डॉक्टरांकडून तपासणी व आरोग्यविषयक मार्गदर्शन मिळाल्यामुळे नागरिकांना या उपक्रमाचा मोठ्या प्रमाणावर फायदा झाला.

गणराया अवॉर्ड 2026 अंतर्गत सामाजिक उपक्रमांना प्रोत्साहन

गणेशोत्सव हा केवळ धार्मिक उत्सव न राहता सामाजिक बांधिलकी, आरोग्य जनजागृती, व्यसनमुक्ती, पर्यावरण संरक्षण, महिला व बाल सुरक्षा, वाहतूक नियमन आणि कायदा व सुव्यवस्था यांसारख्या सामाजिक विषयांना चालना देणारा उत्सव ठरावा, या उद्देशाने पोलीस स्टेशन देवळीच्या वतीने ‘गणराया अवॉर्ड 2026’ हा उपक्रम राबविण्यात येत आहे.

या उपक्रमांतर्गत गणपती मंडळांना विविध सामाजिक व जनजागृतीपर उपक्रम राबविण्यास प्रोत्साहन देण्यात येत असून, त्याचाच एक भाग म्हणून सदर आरोग्य शिबिराचे आयोजन करण्यात आले. या माध्यमातून नागरिकांमध्ये आरोग्याबाबत जागरूकता निर्माण करण्यास तसेच पोलीस विभाग व नागरिक यांच्यातील परस्पर विश्वास व सहकार्य अधिक दृढ करण्यास मदत झाली.

वैद्यकीय पथक व सहकार्य करणाऱ्यांचे आभार

सदर आरोग्य शिबिराच्या यशस्वी आयोजनासाठी शालिनीताई मेघे हॉस्पिटल, सावंगी (मेघे) येथील तज्ञ वैद्यकीय पथकाचे विशेष सहकार्य लाभले. तसेच श्री. बाल गणेश मित्र मंडळ समिती देवळीचे पदाधिकारी, पोलीस अधिकारी व अंमलदार आणि सहकार्य करणाऱ्या सर्व नागरिकांचे मोलाचे योगदान राहिले.

पोलीस स्टेशन देवळीचे ठाणेदार संदिप कापडे व पोलीस स्टेशन मधील पोलीस कर्मचारी श्री. बाल गणेश मित्र मंडळ समिती देवळी यांच्या संयुक्त विद्यमाने आयोजित करण्यात आलेले हे आरोग्य शिबिर नागरिकांच्या आरोग्याची काळजी घेणारे व सामाजिक बांधिलकी जपणारे महत्त्वपूर्ण पाऊल ठरले.