गवळाऊ गायीच्या गोमयापासून निर्मित ईको फ्रेंडली गणपती मूर्ती उपलब्ध
सीईओ पराग सोमण यांच्या हस्ते स्वत: खरेदी करून विक्रीचा शुभारंभ
चांदा ब्लास्ट प्रतिनिधी. अविनाश नागदेवे
वर्धा : गवळाऊ शासकिय पशु पैदास प्रक्षेत्र, हेटीकुंडी आणि गवळाऊ सेंद्रिय निविष्ठा महिला बचत गट, हेटीकुंडी यांचा संयुक्त उपक्रमांतर्गत गवळाऊ गायीच्या गोमयापासून पर्यावरणपूरक ईको फ्रेंडली गणपती मूर्ती तयार करण्यात आल्या आहे. मूर्ती विक्रीचा शुभारंभ मुख्य कार्यकारी अधिकारी पराग सोमण व जिल्हा ग्रामीण विकास यंत्रणेच्या प्रकल्प संचालक वैशाली रसाळ यांच्या हस्ते करण्यात आला.
पशुसंवर्धन आयुक्त डॉ.किरण पाटील, मुख्य कार्यकारी अधिकारी पराग सोमण, प्रकल्प संचालक वैशाली रसाळ, महाराष्ट्र पशुधन विकास मंडळाचे मुख्य कार्यकारी अधिकारी डॉ.शितलकुमार मुकणे, शासकीय पशुपैदास प्रक्षेत्राच्या व्यवस्थापक डॉ.पूजा काळे यांच्या मार्गदर्शनात हा उपक्रम राबविण्यात आला. या मूर्तीची प्रथम खरेदी पराग सोमण यानी स्वतः केली.
याप्रसंगी शासकीय पशुपैदास प्रक्षेत्राचे पशुवैद्यकीय अधिकारी डॉ.बि.व्ही.वंजारी, जिल्हा व्यवस्थापक विपणन मनीष कावडे, उपजीविका व्यवस्थापक प्रतीक मुनेश्वर, कारंजा तालुका अभियान व्यवस्थापक हेमंत काकडे तसेच महिला बचत गटाच्या मंगला कौरती, माला डोंगरे, ममता आसोले, शिल्पा पाटील, सुरेखा इवनाते इत्यादींची उपस्थिती होती.
गोमयापासून मूर्ती बनविण्यासाठी सदर बचत गटाच्या महिलांनी गोविज्ञान अनुसंधान केंद्र देवालापर, जि.नागपूर येथे पाच दिवसांचे प्रशिक्षण घेतले. त्यानुसार सदर मूर्ती तयार करण्यात आल्या असून वर्धा येथे वर्धिनी विक्री केंद्र व कारंजा पंचायत समिती येथे गणपती मूर्ती विक्री करिता उपलब्ध करून देण्यात आल्या आहे.
या गणपतीचे वैशिष्टे म्हणजे पवित्र गोमयापासून बनविलेले असून शंभर टक्के विघटनशील, पर्यावरणपूरक, समृध्दीचे प्रतिक, नैसर्गीक रंगाचा वापर, झाडासाठी सेंद्रिय खत म्हणून सहज वापर, गवळाऊ संवर्धनाचा पर्यावरणपूरक उपक्रम आहे . सदर ८ इंच मूर्ती ८०० रुपये प्रती तर १२ इंच १ हजार २०० रुपये याप्रमाणे दर असून पर्यावरण हिताच्या दृष्टीने या मूर्तिची प्रतिष्ठापना करावी, असे आवाहन जिल्हा परिषद प्रशासनाद्वारे करण्यात आले आहे.
