दोन शिक्षकासह तीन कर्मचारी निलंबित

दोन शिक्षकासह तीन कर्मचारी निलंबित

 मतदार यादीच्या कामात निष्काळजीपणा

चंद्रपूर :- मतदार यादीची तयारी, पुनरावलोकन, दुरुस्ती तसेच नियमानुसार मतदारांची नावे समाविष्ट करणे किंवा वगळणे या अधिकृत कर्तव्यात हयगय, टाळाटाळ आणि निष्काळजीपणा केल्याचे निष्पन्न झाल्याने चंद्रपुरातील दोन शिक्षकांसह तीन कर्मचा-यांना जिल्हाधिका-यांच्या आदेशान्वये निलंबित करण्यात आले आहे.

मुरलीधर बागला हायस्कूल, चंद्रपूर येथील सहायक शिक्षक आर.बी. येसांबरे,  चंद्रपूर मनपा शाळेतील सहायक शिक्षक आनंद गेडाम यांच्यासह चंद्रपूर वेकोली क्षेत्रीय मुख्यालयातील सोनू ढुमणे, किरण रामटेके आणि मनोज शेंडे या तीन कर्मचा-यांना जिल्हाधिका-यांनी तात्काळ निलंबित केले आहे.

जिल्हाधिकारी तथा जिल्हा निवडणूक अधिकारी, चंद्रपूर यांनी लोकप्रतिनिधित्व अधिनियम, १९५० च्या कलम १३(आ) तसेच महाराष्ट्र नागरी सेवा (शिस्त व अपील) नियम, १९७९ मधील नियम ४(१) अंतर्गत प्राप्त अधिकारांचा वापर करून ही कारवाई केली आहे. मतदार यादीशी संबंधित निवडणूक विषयक अधिकृत कर्तव्य पार पाडताना झालेल्या गंभीर निष्काळजीपणाच्या पार्श्वभूमीवर ही शिस्तभंगाची कारवाई प्रस्तावित करण्यात आली आहे.

महाराष्ट्र नागरी सेवा (वर्तन) नियम, १९७९ मधील नियम १६ नुसार निलंबनाच्या कालावधीत सहा. शिक्षक श्री. येसांबरे, सहा. शिक्षक आनंद गेडाम, वेकोलीचे कर्मचारी सोनू ढुमणे, किरण रामटेके आणि मनोज शेंडे यांना कोणत्याही प्रकारची खाजगी नोकरी स्वीकारता येणार नाही किंवा व्यवसाय करता येणार नाही. नियमांचे उल्लंघन झाल्यास त्यांच्याविरुद्ध गैरवर्तनाची कारवाई करण्यात येईल. तसेच अशा परिस्थितीत त्यांना निर्वाह भत्त्याचाही लाभ मिळणार नाही, असे जिल्हाधिका-यांच्या आदेशात स्पष्ट करण्यात आले आहे.