मुख्यमंत्री देवेंद्र फडणवीस यांच्या वाढदिवसानिमित्त मंगळवारी गोंडपिपरीत भव्य महाआरोग्य व मोफत शस्त्रक्रिया शिबिर

चांदा ब्लास्ट प्रतिनिधी. राजेश डोंगरे

राज्याचे लोकप्रिय मुख्यमंत्री देवेंद्र फडणवीस यांच्या वाढदिवसानिमित्य राजुरा विधानसभा मतदारसंघाचे आमदार देवराव भोंगळे यांचे संकल्पनेतून मंगळवार दि. २१ जुलै २०२६ रोजी गोंडपिपरी येथील कला व वाणिज्य महाविद्यालयात भव्य महाआरोग्य शिबिराचे आयोजन करण्यात आले आहे.

या शिबिरामध्ये जवळपास सर्वच प्रकारच्या आजारांचे निदान, उपचार व शस्त्रक्रिया निःशुल्कपणे करून देण्यात येणार आहेत. अशी माहिती आयोजक म्हणून भारतीय जनता पार्टीच्या वतीने देण्यात आली आहे.

सदर शिबीर सकाळी १० वाजेपासून ते दुपारी ०३ वाजेपर्यंत सुरू राहणार असून याठिकाणी शालिनी मेघे हॉस्पिटल ॲन्ड रिसर्च सेंटर वानाडोंगरी येथील मेडिसीन, नेत्ररोग, सर्जरी, बालरोग, स्त्रीरोग, कान-नाक-घसा, अस्थिरोग, त्वचारोग कॅन्सर आणि दंत तपासणी यांसारख्या रोगांवरील तज्ज्ञ डॉक्टरांची टीम उपस्थित राहणार असून याठिकाणी सर्व चाचण्या मोफत करून देण्यात येणार आहे.

आरोग्य शिबिराकरिता नोंदणी प्रक्रिया सुरू झाली असून नागरिकांनी जवळच्या भाजपा जनसंपर्क कार्यालयात जाऊन तसेच नजिकच्या भाजपा पदाधिकाऱ्यांकडे आपल्या नावाची नोंद करावी. शिबिरात येताना आधारकार्ड व केशरी किंवा पिवळे रेशनकार्ड सोबत आणावे, असेही आवाहन आमदार सुधीर मुनगंटीवार सेवा केंद्र तथा आमदार देवराव भोंगळे यांचे भाजपा जनसंपर्क कार्यालयाकडून करण्यात येत आहे.