गो-तस्करांवर होणार मकोका अंतर्गत कारवाई; एस पिंचा कडक इशारा

चांदा ब्लास्ट प्रतिनिधी. अतुल कोल्हे

चंद्रपूर :- जिल्ह्यात अवैध गो-वंश तस्करी, कत्तल आणि पशुधनावरील क्रूरतेला आळा घालण्यासाठी जिल्हा पोलिसांनी मोठी आणि निर्णायक कारवाई सुरू केली आहे. 23 मे रोजी दुपारी पोलीस मुख्यालयातील ड्रिल शेड येथे आयोजित विशेष “ओळख परेड व प्रतिबंधात्मक कारवाई कॅम्प”मध्ये तब्बल २९३ सराईत गो-तस्करांना हजर करण्यात आले, ज्यामुळे गुन्हेगारांमध्ये मोठी खळबळ उडाली आहे.

पोलीस अधीक्षक आयुष नोपानी यांच्या मार्गदर्शनाखाली आणि अपर पोलीस अधीक्षक ईश्वर कातकडे यांच्या उपस्थितीत हा कॅम्प घेण्यात आला. यामध्ये जिल्ह्यातील सर्व उपविभागांतील (चंद्रपूर, वरोरा, चिमूर, ब्रह्मपुरी, मूल, राजुरा, गडचांदूर) गुन्हेगारांची सखोल माहिती पोलिसांकडे असल्याचे स्पष्ट करण्यात आले.

या कॅम्पमध्ये उपस्थित आरोपींना पोलिसांनी स्पष्ट शब्दांत इशारा दिला की, यापुढे गो-तस्करीसारख्या संघटित गुन्ह्यांवर ‘मकोका’ (MCOCA) अंतर्गत कारवाई केली जाईल अशा गुन्ह्यांमध्ये जामीन मिळणे कठीण होणार, अवैध कमाईची मालमत्ता जप्त केली जाईल, तस्करीसाठी वापरलेली वाहने सरकार जमा (राजसात) केली जातील. पोलीस अधीक्षक आयुष नोपानी यांनी सांगितले की, “चंद्रपूर जिल्हा पोलीस अवैध गो-तस्करी पूर्णपणे संपवण्यास कटिबद्ध आहे. आज हजर असलेले सर्व आरोपी पोलिसांच्या रडारवर आहेत. यानंतर कोणीही बेकायदेशीर कृत्य करताना आढळल्यास त्याच्यावर थेट ‘मकोका’ अंतर्गत कारवाई केली जाईल.”

तसेच नागरिकांना आवाहन करण्यात आले आहे की, अशा प्रकारच्या बेकायदेशीर कृत्यांची माहिती तत्काळ पोलिसांना द्यावी. माहिती देणाऱ्यांची ओळख पूर्णपणे गुप्त ठेवली जाईल.

या कारवाईत स्थानिक गुन्हे शाखा (LCB), सर्व उपविभागीय पोलीस अधिकारी आणि विशेष पथकांनी महत्त्वाची भूमिका बजावली. संपूर्ण जिल्ह्यात एकाच वेळी अशी कडक मोहीम राबवून पोलिसांनी गुन्हेगारीविरुद्ध शून्य सहनशीलतेचा संदेश दिला आहे.

 एकंदरीत, चंद्रपूर जिल्हा पोलिसांच्या या आक्रमक मोहिमेमुळे गो-तस्करांमध्ये भीतीचे वातावरण निर्माण झाले असून, येत्या काळात अवैध कृत्यांवर मोठा आळा बसण्याची शक्यता व्यक्त केली जात आहे.