वेगवान गाड्या, निष्काळजी व्यवस्था आणि तुटलेला विश्वास

चांदा ब्लास्ट

घुग्घुस :_ 31 डिसेंबर 2025 रोजी दुपारी सुमारे 3.30 वाजता घुग्घुस टी-पॉइंट (धानोरा फाटा) येथे झालेल्या भीषण रस्ता अपघाताने पुन्हा एकदा प्रशासनाची ढिसाळ वाहतूक व्यवस्था आणि निष्काळजीपणा उघड केला आहे. या दुर्दैवी घटनेत बार्बर शॉपचे मालक शंकर जुनारकर यांचा जागीच मृत्यू झाला, तर चहाटपरी चालक अमर महादेव झोड़े (वय 24) गंभीर जखमी झाला. याशिवाय रस्त्याच्या कडेला उभ्या असलेल्या कारला चिरडल्याने अजय राठोड (49), प्रियंका राठोड (32) आणि ओवी राठोड (16) हे तिघेही गंभीर जखमी झाले असून त्यांच्यावर रुग्णालयात उपचार सुरू आहेत.

मिळालेल्या माहितीनुसार सिमेंटने भरलेला बल्कर वाहन (MP 11 ZD 0931) भरधाव वेगात येत आधी एका कारला (MH 34 BV 8861) मागून धडक देऊन पळून जाण्याचा प्रयत्न करत होता. त्याच दरम्यान धानोरा फाटा येथे रस्त्याच्या कडेला उभी असलेली दुसरी कार (MH 34 AA 0051) जोरदार धडकेत चिरडली गेली. या धडकेमुळे बल्कर वाहनाचा ताबा सुटला आणि ते थेट रस्त्यालगत असलेल्या बार्बर शॉप व चहाटपरीवर घुसले. हा अपघात केवळ दुर्दैवी घटना नसून, वाहतूक नियमांच्या सर्रास उल्लंघनाचे आणि कमकुवत प्रशासनिक नियंत्रणाचे द्योतक आहे.

अपघातानंतर परिसरात तीव्र संताप उसळला. 1 जानेवारी 2026 रोजी पीडित कुटुंबीय, स्थानिक नेते आणि नागरिकांनी न्यायाच्या मागणीसाठी प्रथम घुग्घुस पोलीस ठाण्यात धाव घेतली. मात्र ठोस आश्वासन न मिळाल्याने संतप्त नागरिकांनी धानोरा फाटा येथे सुमारे तीन तास चक्काजाम केला. दबावानंतर सायंकाळी मृतकाच्या कुटुंबाला 10 लाख रुपये आणि जखमी चहाटपरी चालकाच्या कुटुंबाला 1 लाख रुपयांची मदत जाहीर करण्यात आली. मात्र कारमध्ये जखमी झालेल्या कुटुंबाला कोणतेही स्पष्ट आश्वासन का देण्यात आले नाही? न्याय फक्त मुआवज्याच्या घोषणांपुरताच मर्यादित आहे का, असा सवाल उपस्थित होत आहे.

स्थानिक नागरिकांचे म्हणणे आहे की गडचांदूर–चंद्रपूर मार्गावर जड वाहने भरधाव वेगाने चालवणे, ओव्हरलोडिंग आणि नियमांचे खुलेआम उल्लंघन ही काही नवीन बाब नाही. वर्षानुवर्षे नागरिक इशारे देत आहेत, पण ना पोलिसांची ठोस कारवाई दिसते, ना प्रशासनाची दूरदृष्टी. प्रत्येक अपघातानंतर काही दिवसांची औपचारिक हालचाल होते आणि नंतर सर्व काही पुन्हा पूर्ववत होते.

या घटनेमुळे पुन्हा एकदा गंभीर प्रश्न उभे राहिले आहेत—प्रशासन आणखी एखाद्या निष्पाप जीवाच्या बळीची वाट पाहत आहे का? धानोरा फाटा सारख्या संवेदनशील ठिकाणी कायमस्वरूपी सुरक्षा उपाय, वेग नियंत्रण, जड वाहनांवर कडक नजर आणि जबाबदार अधिकाऱ्यांची जबाबदारी निश्चित केली जाणार नाही का?

घुग्घुस पोलिसांनी गुन्हा दाखल करून तपास सुरू केला आहे, मात्र नागरिकांना आता केवळ चौकशी नको, तर ठोस आणि कायमस्वरूपी उपाययोजना हव्या आहेत. कारण रस्त्यांवर कायद्याची भीती आणि प्रशासनाची जबाबदारी स्पष्टपणे दिसेपर्यंत प्रत्येक अपघातानंतर उसळणारा जनआक्रोश शांत होणार नाही.