अवैध दारू तस्करी रॅकेटचा पर्दाफाश

चांदा ब्लास्ट प्रतिनिधी. अविनाश नागदेवे

वर्धा शहर पोलिसांनी अवैध दारू तस्करीविरोधात मोठी कारवाई करत तस्करीच्या रॅकेटचा पर्दाफाश केला आहे. पोलिसांनी स्विफ्ट डिझायर कारसह तब्बल ₹11 लाख 20 हजार किमतीचा अवैध विदेशी दारूचा साठा जप्त केला असून एका आरोपीस अटक करण्यात आली आहे, तर वाहन मालक फरार आहे.

गुप्त माहितीवरून कारवाई

वर्धा शहर पोलीस ठाण्यातील पोलीस उपनिरीक्षक विशाल सवाई यांना गुप्त बातमीदारांकडून मिळालेल्या खात्रीशीर माहितीनुसार, वरिष्ठ अधिकाऱ्यांच्या मार्गदर्शनाखाली धुणीवाले चौक येथे नाकाबंदी लावण्यात आली होती.

दि. 27 डिसेंबर रोजी सकाळी 11:55 वाजता, एक पांढऱ्या रंगाची मारुती स्विफ्ट डिझायर (MH-31-C-9959) संशयास्पदरीत्या येताना दिसली. पोलिसांनी वाहन थांबवण्याचा इशारा दिला असता चालकाने भरधाव वेगाने गाडी पळवली.पोलिसांनी शिताफीने पाठलाग करून सदर वाहन ईसावा ले-आउट, विकास विद्यालयाच्या मागे, गांधीनगर, वर्धा येथे थांबवले. वाहनाची झडती घेतली असता त्यामध्ये मोठ्या प्रमाणात अवैध विदेशी दारू लपवून वाहतूक केली जात असल्याचे निष्पन्न झाले.

 आरोपी कोण?

आसिफ खान अकबर खान पठाण (वय 32, रा. आनंदनगर, वर्धा) – अटक

बादल धवणे (वय 33, रा. वर्धा) – फरार (वाहन मालक)

 जप्त मुद्देमाल (एकूण ₹11,19,200)

स्विफ्ट डिझायर कार – ₹8,00,000

रॉयल स्टॅग विदेशी दारू – 09 पेट्या – ₹1,51,200

ओल्ड मंक विदेशी दारू – 07 पेट्या – ₹1,00,800

ओसी ब्लू विदेशी दारू – 05 पेट्या – ₹67,200

> सर्व जप्तीची कार्यवाही पंचांच्या उपस्थितीत पारदर्शकपणे करून मुद्देमाल सील करण्यात आला आहे.

गुन्हा दाखल

आरोपींविरुद्ध महाराष्ट्र दारूबंदी अधिनियम अंतर्गत कलम 65(A), 65(E), 77(A), 83 तसेच मोटार वाहन अधिनियम अंतर्गत कलम 181, 130, 177 अन्वये गुन्हा दाखल करण्यात आला असून फरार आरोपीचा शोध सुरू आहे.

वरिष्ठ अधिकाऱ्यांचे मार्गदर्शन

ही कारवाई पोलीस अधीक्षक सौरव कुमार अग्रवाल, अपर पोलीस अधीक्षक सदाशिव वाघमारे, उपविभागीय पोलीस अधिकारी प्रमोद मकेश्वर यांच्या मार्गदर्शनाखाली, पोलीस निरीक्षक संतोष ताले यांच्या देखरेखीखाली PSI विशाल सवाई व त्यांचे पथक विजय पंचटिके, शैलेश चाफलेकर, महेंद्र पाटील, शिवदास डोईफोडे, भूषण चव्हाण यांनी यशस्वी केली.

नागरिकांकडून कौतुक

वर्धा शहर पोलिसांच्या या धडाकेबाज कारवाईमुळे अवैध दारू तस्करांमध्ये खळबळ उडाली असून, नागरिकांनी पोलिसांच्या तत्परतेचे आणि धाडसाचे कौतुक केले आहे