ट्रॅक्टरच्या भीषण अपघातात आईचा मृत्यू तर लेक गंभीर

चांदा ब्लास्ट प्रतिनिधी. अतुल कोल्हे

 पोलिस स्टेशन भद्रावती अंतर्गत येत असलेल्या गणपती वॉर्ड गवराळा येथील प्रभाकर उद्धव निळे, श्रीमती बेबीबाई प्रमोद मेश्राम, वैशाली महेश तोडासे या रात्री ८.०० वाजता भद्रावती तालुक्यातील कोकेवाडा येथील राईस मिलवर धान भरडाई करिता ट्रॅक्टर क्र. एम. एच. ३४ सी. जे. १८३९ ट्रॉली क्र. एम. ३४ सीजे. २२२७ ने घेऊन जात असताना बेलगाव चंदनखेडा मार्गावर खड्डा चुकविताना भीषण अपघात झाला.

            यात ट्रॅक्टर ट्रॉलीवर धानाच्या पोत्यावर बसलेल्या मायलेकी यात दबल्या गेल्या, त्यात बेबीबाई प्रमोद मेश्राम यांचे डोक्याला जबरदस्त मार लागुण अती रक्तस्त्राव झाल्याने त्यांना तात्काळ चंदनखेडा येथील ग्रामीण रुग्णालय येथे नेले असता त्या मृत झाल्याचे निदान झाले. दुसऱ्या वैशाली महेश तोडासे यांना गंभीर दुखापत झाल्याने त्यांना चंद्रपूर येथील जिल्हा रुग्णालयात हलविण्यात आले. तर प्रभाकर उद्धव निळे हे किरकोळ जखमी झाले आहे.

           घटनेची माहिती मिळताच भद्रावती पोलीस स्टेशन चे उपनिरीक्षक किशोर मुळे आपल्या ताफ्यासह तात्काळ घटनास्थळी दाखल होऊन जखमींना रुग्णालयात हलविले.

भद्रावती पोलीस स्टेशन येथे दि.१८ रोजी रात्री. १.०० वाजता तक्रार दाखल करण्यात आली असून फिर्यादी प्रभाकर उद्धव निळे यांचे सांगण्यावरून ट्रॅक्टर चालक किशोर बंडू आत्राम रा. चिरादेवी त. भद्रावती यांचे विरोधात निष्काळजी पनाने वाहन भरधाव चालवून अपघातास कारणीभूत असल्याबाबत भारतीय दंड संहिता ( BNS) 2023 कलम २८१, भारतीय दंड संहिता १०६ ( १ ) व मोटार वाहन अधिनियम ( १९९८ ) १३४ अन्वये गुन्ह्याची नोंद करण्यात आली आहे.

           ट्रॅक्टर चालकास ताब्यात घेण्यात आले असले तरी ट्रॅक्टर चालकासह ट्रॅक्टर मालक सुद्धा तेवढेच जबाबदार असल्याने चालकासह मालकावर सुद्धा कार्यवाही करण्यात यावी अशी मागणी मृतकाच्या कुटुंबातर्फे करण्यात येत आहे. पुढील तपास भद्रावती पोलिस स्टेशन चे पोलिस निरिक्षक योगेश्वर पारधी यांचे मार्गदर्शनात भद्रावती पोलिस करीत आहे.