नागपूर विभागीय क्रीडा स्पर्धेत RCERT च्या मुलींच्या बास्केटबॉल संघाला द्वितीय क्रमांक
बजाज इन्स्टिटय़ूट ऑफ टेक्नॉलॉजी वर्धा येथे आयोजित स्पर्धेत खेळाडूंची उत्कृष्ट कामगिरी; महाविद्यालयाच्या क्रीडा यशात मानाची भर
चांदा ब्लास्ट
चंद्रपूर : सरदार पटेल मेमोरियल सोसायटी (ट्रस्ट), चंद्रपूर द्वारा संचालित राजीव गांधी कॉलेज ऑफ इंजिनिअरिंग, रिसर्च अँड टेक्नॉलॉजी (RCERT), चंद्रपूर येथील विद्यार्थिनींनी बाबासाहेब आंबेडकर तंत्रशास्त्र विद्यापीठ (DBATU) अंतर्गत बजाज इन्स्टिटय़ूट ऑफ टेक्नॉलॉजी वर्धा येथे आयोजित नागपूर विभागीय आंतरमहाविद्यालयीन क्रीडा स्पर्धा २०२६-२७ मध्ये बास्केटबॉल स्पर्धेत द्वितीय क्रमांक पटकावून महाविद्यालयाचा गौरव वाढविला.
या स्पर्धेत RCERT च्या मुलींच्या बास्केटबॉल संघाने उत्कृष्ट सांघिक खेळ, जिद्द, चिकाटी आणि क्रीडा कौशल्याचे प्रदर्शन करत अंतिम फेरीपर्यंत मजल मारली. संपूर्ण स्पर्धेदरम्यान खेळाडूंनी दाखविलेला आत्मविश्वास, समन्वय आणि खेळातील सातत्यपूर्ण कामगिरी यामुळे संघाने द्वितीय क्रमांक मिळवत महाविद्यालयाच्या क्रीडा यशात महत्त्वपूर्ण योगदान दिले.
या संघामध्ये तन्वी काटकमवार (चतुर्थ वर्ष, CSE), धनश्री एकवणकर (चतुर्थ वर्ष, CSE डेटा सायन्स), कावेरी चौगुले (तृतीय वर्ष, मायनिंग), देवश्री आंबटकर (तृतीय वर्ष, CSE डेटा सायन्स), निकिता नखाते (तृतीय वर्ष, CSE), निकिता आवघडे (तृतीय वर्ष, CSE), नंदिनी तार्हेवार (चतुर्थ वर्ष, इलेक्ट्रॉनिक्स) आणि पावनी रामटेके (चतुर्थ वर्ष, CSE डेटा सायन्स) या विद्यार्थिनींचा समावेश होता.
विद्यार्थिनींच्या या उल्लेखनीय यशाबद्दल सरदार पटेल मेमोरियल सोसायटीचे अध्यक्ष विनोद दत्तात्रेय आणि महाविद्यालयाचे प्राचार्य डॉ. अनिल झेड. चिताडे यांनी सर्व खेळाडूंचे अभिनंदन करून त्यांच्या कामगिरीचे कौतुक केले व पुढील क्रीडा वाटचालीस शुभेच्छा दिल्या. तसेच महाविद्यालयाचे शारीरिक शिक्षण संचालक प्रा. आदित्य आंबटकर यांनी विद्यार्थिनींना मार्गदर्शन व प्रोत्साहन दिले.
शैक्षणिक क्षेत्रासोबतच क्रीडा क्षेत्रातही RCERT च्या विद्यार्थिनी आपली गुणवत्ता सिद्ध करत असून, बजाज इन्स्टिटय़ूट ऑफ टेक्नॉलॉजी वर्धा येथे आयोजित नागपूर विभागीय स्पर्धेतील बास्केटबॉलमधील हे यश महाविद्यालयासाठी अभिमानास्पद ठरले आहे. विद्यार्थिनींची मेहनत, जिद्द, शिस्त आणि सांघिक भावना यांचे हे फलित असून, त्यांच्या या यशामुळे महाविद्यालयाच्या क्रीडा क्षेत्रातील लौकिकात आणखी भर पडली आहे. या यशाबद्दल महाविद्यालयातील प्राध्यापक, शिक्षकेतर कर्मचारी आणि विद्यार्थ्यांनी विजयी संघाचे अभिनंदन केले.
