विवेकानंद माध्यमिक विद्यालयात “संविधान दिन” साजरा
चांदा ब्लास्ट प्रतिनिधी. अतुल कोल्हे
विद्यार्थ्यांमध्ये संवैधानिक मूल्ये रूजविण्याच्या अनुषंगाने मूल्यवर्धन कार्यक्रमाच्या माध्यमातून संविधान दिनानिमित्त दिनांक २२नोव्हेंबर ते २६ नोव्हेंबर या कालावधीत विवेकानंद विद्यालयात विविध कार्यक्रमांचे आयोजन करण्यात आले होते. संविधानाच्या मूल्यांबद्दल कलात्मक पद्धतीने जनजागृती करण्यासाठी चित्रकला स्पर्धा आयोजित केली होती.तसेच संविधान निर्मितीची प्रक्रिया व मुलभूत हक्क आणि कर्तव्ये यांची ओळख संविधान व्याख्यानातून सेवानिवृत्त मुख्याध्यापक श्री .ताजणे सर यांनी विद्यार्थ्यांना दिली.
संविधानातील “एकता व अखंडता” या मूल्यांचा अनुभव मानवी साखळीची निर्मिती करून दिला. सोबतच संविधान विषयक ज्ञान वाढविण्यासाठी प्रश्न मंजुषा कार्यक्रम आयोजित केला. दिनांक २६ नोव्हेंबरला महामानव डॉ. बाबासाहेब आंबेडकर यांच्या प्रतिमेचे पूजन केल्यानंतर शाळे भोवतालच्या परिसरात प्रभातफेरीच्या माध्यमातून संविधानाबद्दल आदर व जागरूकता निर्माण करण्यात आली..सदर सर्व कार्यक्रम मुख्याध्यापिका कल्पना बांदुरकर व सांस्कृतिक विभाग प्रमुख तुकाराम पोफळे यांच्या मार्गदर्शनाखाली घेण्यात आले.
सर्व कार्यक्रमाचे आयोजन यशस्वी पणे होण्यासाठी सौ.आशा गावंडे, मेघा ताजणे, दयाकर मग्गीडवार, संजय आगलावे तसेच शिक्षकेतर कर्मचारी विनोद गावंडे, रामदस ठक, विश्वनाथ हरबडे, बंडू कांबळे यांनी अनमोल सहकार्य केले. वरील सर्व कार्यक्रमात विद्यार्थ्यांनी उस्फुर्तपणे सहभाग घेतला.
