जनजातीय गौरव दिन सप्ताह उत्साहात साजरा करा – जिल्हाधिकारी वसुमना पंत यांचे आवाहन

चांदा ब्लास्ट

चंद्रपूर :_ भगवान बिरसा मुंडा यांच्या 151 व्या जयंतीनिमित्त 11 ते 18 नोव्हेंबर 2026 या कालावधीत जिल्ह्यात ‘जनजातीय गौरव दिन सप्ताह’ साजरा करण्यात येत आहे. आदिवासी समाजाच्या गौरवशाली इतिहासाचे स्मरण, आदिवासी स्वातंत्र्यसैनिकांच्या योगदानाचा सन्मान तसेच आदिवासी विकास विभागाच्या विविध कल्याणकारी योजनांची माहिती तळागाळातील लाभार्थ्यांपर्यंत पोहोचविण्याच्या उद्देशाने या सप्ताहाचे आयोजन करण्यात आले आहे. जिल्ह्यातील सर्व संबंधित विभाग, शासकीय यंत्रणा, शैक्षणिक संस्था आणि नागरिकांनी या सप्ताहात सक्रिय सहभाग नोंदवून जनजातीय गौरव दिन सप्ताह उत्साहात साजरा करावा, असे आवाहन जिल्हाधिकारी वसुमना पंत यांनी केले आहे.

एकात्मिक आदिवासी विकास प्रकल्प, चंद्रपूर यांच्या वतीने या सप्ताहात विविध जनजागृतीपर, सामाजिक, शैक्षणिक व आरोग्यविषयक उपक्रमांचे आयोजन करण्यात आले आहे. आदिवासी बांधवांना शासनाच्या विविध योजनांची माहिती देणे, आवश्यक कागदपत्रे मिळविण्यासाठी मार्गदर्शन करणे तसेच पात्र लाभार्थ्यांना योजनांचा प्रत्यक्ष लाभ मिळवून देण्यासाठी प्रोत्साहित करणे, यावर विशेष भर देण्यात येणार आहे

सप्ताहाच्या पहिल्या दिवशी, 11 नोव्हेंबरपासून चित्ररथाच्या माध्यमातून आदिवासी विकास विभागाच्या विविध योजनांचा प्रचार व प्रसिद्धी करण्यात येणार आहे. दि. 12 नोव्हेंबर रोजी जनजागृती कार्यक्रमासह सप्ताहाचा औपचारिक शुभारंभ करण्यात येणार आहे.

दि. 13 नोव्हेंबर रोजी पारधी समाजातील नागरिकांसाठी विशेष मेळाव्याचे आयोजन करण्यात येणार असून, यामध्ये आधार कार्ड, जातीचे प्रमाणपत्र तसेच इतर आवश्यक शासकीय कागदपत्रांबाबत मार्गदर्शन व सहाय्य करण्यात येणार आहे. दि. 14 नोव्हेंबर रोजी आदिवासी स्वातंत्र्यसैनिकांची स्मारके, पुतळे व शहीद भूमी येथे दीपोत्सव आणि अभिवादन कार्यक्रम आयोजित करण्यात येणार आहेत.

दि. 15 नोव्हेंबर रोजी भगवान बिरसा मुंडा यांच्या 151 व्या जयंतीनिमित्त प्रकल्पांतर्गत शासकीय आदिवासी आश्रमशाळा व वसतिगृहांमध्ये अभिवादन सोहळ्यांचे आयोजन करण्यात येणार आहे. या माध्यमातून भगवान बिरसा मुंडा यांचे जीवनकार्य, स्वातंत्र्यलढ्यातील योगदान आणि आदिवासी समाजाच्या हक्कांसाठी त्यांनी दिलेल्या संघर्षाची माहिती विद्यार्थ्यांना देण्यात येणार आहे.

दि. 16 नोव्हेंबर रोजी बहुउद्देशीय केंद्रावर आरोग्य तपासणी शिबिराचे आयोजन करण्यात येणार आहे. तसेच दि. 17 व 18 नोव्हेंबर रोजी पंचायत क्षेत्र विस्तार अधिनियम अर्थात पेसा (PESA) विषयक जनजागृती कार्यशाळा आयोजित करण्यात येणार आहेत. लोकप्रतिनिधी व वरिष्ठ अधिकाऱ्यांच्या उपस्थितीत सप्ताहाचा समारोप करण्याचे नियोजन करण्यात आले आहे.

आदिवासी समाजाच्या सर्वांगीण विकासासाठी शासनामार्फत शिक्षण, आरोग्य, रोजगार, कौशल्य विकास, आर्थिक सक्षमीकरण तसेच सामाजिक सुरक्षेच्या विविध योजना राबविण्यात येत आहेत. या योजनांची माहिती प्रत्येक पात्र लाभार्थ्यापर्यंत पोहोचणे आवश्यक आहे. यासाठी संबंधित विभागांनी समन्वयाने कार्य करावे, असे आवाहन जिल्हाधिकारी वसुमना पंत यांनी केले आहे.

नागरिकांनी सक्रिय सहभाग नोंदवावा

जिल्ह्यातील आदिवासी बांधव, विद्यार्थी, युवक, महिला, सामाजिक संस्था तसेच नागरिकांनी सप्ताहांतर्गत आयोजित विविध कार्यक्रमांमध्ये उत्स्फूर्त सहभाग नोंदवावा. शासकीय योजनांची माहिती घेऊन सुविधांचा लाभ घ्यावा. अधिक माहितीसाठी एकात्मिक आदिवासी विकास प्रकल्प कार्यालय, चंद्रपूर येथे संपर्क साधावा, असे आवाहन प्रकल्प अधिकारी, एकात्मिक आदिवासी विकास प्रकल्प, चंद्रपूर यांनी केले आहे.