‘कोण होणार करोडपती’च्या मंचावर… करंजीकर पवन श्रीवासकर..!
अभिनेत्री माधुरी दीक्षित यांच्यासोबत शूटिंगमध्ये सहभाग ; तब्बल २४ वर्षांनी स्वप्न साकार
चांदा ब्लास्ट प्रतिनिधी. राजेश डोंगरे
गोंडपिपरी :_ काही स्वप्ने वयाच्या मर्यादेत अडकत नाहीत, परिस्थितीच्या ओझ्याखाली दबत नाहीत आणि काळाच्या ओघात कधीच धूसर होत नाहीत. उलट, मनात पेटलेली स्वप्नांची ज्योत जिद्द, चिकाटी आणि आत्मविश्वासाच्या बळावर वर्षानुवर्षे तेवत राहते आणि एक दिवस यशाच्या झगमगत्या मंचावर उजळून निघते! याच जिद्दीची, ज्ञानसाधनेची आणि स्वप्नपूर्तीचा असामान्य प्रवासाची प्रेरणादायी कहाणी आहे करंजी येथील पवन सुरेश श्रीवासकर यांची. २००२ मध्ये मनाशी बाळगलेले “कोण होणार करोडपती”च्या मंचावर पोहोचण्याचे स्वप्न तब्बल २४ वर्षानंतर प्रत्यक्षात साकार झाले आणि एका छोट्याशा गावातील तरुणाने आपल्या ज्ञानाच्या जोरावर थेट महाराष्ट्राच्या लोकप्रिय कार्यक्रमाच्या मंचावर धडक मारली! लाखो स्पर्धकांच्या गर्दीतून निवड होणे, अभिनेत्री माधुरी दीक्षित यांच्यासोबत चार एपिसोडच्या शूटिंगमध्ये सहभागी होणे आणि आपल्या गावचे नाव राज्यभर पोहोचवणे, हा केवळ पवन यांचा वैयक्तिक विजय नाही, तर स्वप्न पाहणाऱ्या आणि ती पूर्ण करण्यासाठी आयुष्यभर झटणाऱ्या प्रत्येकासाठी प्रेरणेचा दीपस्तंभ आहे. कारण करोडपति होण्यापेक्षाही आपल्या स्वप्नांना सत्यात उतरविण्याचे समाधान कितीतरी मोठे असते, हे पवन श्रीवासकर यांनी आपल्या प्रवासातून सिद्ध केले आहे!
*दहा लाख स्पर्धकांमधून निवड!*
‘कोण होणार करोडपती’ या कार्यक्रमासाठी देशभरातून जवळपास १० लाख स्पर्धकांनी नोंदणी केली होती. या प्रचंड स्पर्धेत पवन श्रीवासकर यांनी आपल्या ज्ञानाच्या जोरावर एकामागून एक टप्पे पार केले. नोंदणी, आयव्हीआर (IVR) फोनद्वारे प्रश्नोत्तरे, लेखी परीक्षा, प्रत्यक्ष ऑडिशन, वैयक्तिक मुलाखत आणि व्हिडिओ कॅमेरा रेकॉर्डिंग अशा कठीण निवड प्रक्रियेतून त्यांना जावे लागले. सुमारे १० लाख स्पर्धकांमधून ५५ हजार स्पर्धक आयव्हीआर प्रक्रियेत पोहोचले. त्यातून ८ हजार ६६० स्पर्धकांना प्रत्यक्ष ऑडिशनची संधी मिळाली. पुढील निवड प्रक्रियेतून १५० स्पर्धकांची मुलाखत व व्हिडिओ रेकॉर्डिंगसाठी निवड झाली. प्रत्येक टप्प्यावर आपली गुणवत्ता सिद्ध करत पवन यांनी अंतिम निवड यादीत स्थान मिळविले.
*लेखी परीक्षेत अव्वल तर ऑडिशनमध्ये चमकदार कामगिरी*
२९ ऑगस्ट २०२६ रोजी पुणे येथे झालेल्या प्रत्यक्ष ऑडिशनमध्ये पवन श्रीवासकर यांनी लेखी परीक्षेत २० पैकी तब्बल १९ गुण मिळविले. त्यानंतर वैयक्तिक मुलाखत आणि कॅमेरा रेकॉर्डिंगसह निवड प्रक्रियेतील सर्व टप्पे यशस्वीरीत्या पूर्ण केले. त्यांच्या या कामगिरीमुळे त्यांची कार्यक्रमाच्या शूटिंगसाठी निवड करण्यात आली. अनेक वर्षांपासून मनात जपलेल्या स्वप्नाला प्रत्यक्ष आकार मिळत असल्याचा आनंद त्यांच्या आयुष्यातील अविस्मरणीय क्षण ठरला.
*माधुरी दीक्षितसोबत एकाच मंचावर शूटिंगचा अनुभव*
मुंबईतील गोरेगाव येथे पोहोचल्यानंतर पवन यांना सुप्रसिद्ध अभिनेत्री माधुरी दीक्षित यांच्या उपस्थितीत कार्यक्रमाच्या शूटिंगमध्ये सहभागी होण्याची संधी मिळाली. चार एपिसोडच्या शूटिंग प्रक्रियेत सहभागी होत त्यांनी कार्यक्रमातील विविध सहा टप्पे पार केले. त्यानंतर महत्त्वपूर्ण अशा फास्टेस्ट फिंगर फर्स्ट (FFF) प्रक्रियेतही त्यांनी सहभाग नोंदविला. देशभरातून निवड झालेल्या २० प्रतिभावान स्पर्धकांसोबत स्पर्धेचा अनुभव घेताना त्यांना अनेक नवीन गोष्टी शिकायला मिळाल्या. अत्यंत चुरशीच्या या स्पर्धेत स्वतःला सिद्ध करण्याचा प्रयत्न करताना त्यांना मोठा अनुभव आणि आयुष्यभरासाठी अविस्मरणीय शिदोरी मिळाली.
*जबाबदाऱ्यांसह ज्ञानाची अखंड साधना*
पवन श्रीवासकर यांचा हा प्रवास केवळ एका टेलिव्हिजन कार्यक्रमापुरता मर्यादित नाही. करंजीसारख्या छोट्याशा गावातून सुरू झालेल्या त्यांच्या प्रवासामागे अनेक वर्षांची मेहनत, वाचनाची आवड, सामान्यज्ञानाची जिज्ञासा आणि स्वतःला सतत अद्ययावत ठेवण्याची वृत्ती आहे. नोकरी, कुटुंब आणि दैनंदिन जबाबदाऱ्या सांभाळतानाही त्यांनी अभ्यासाची कास कधी सोडली नाही.
*पैशाची नाही पण समाधानाची श्रीमंती!*
पवन श्रीवासकर यांना करोडपती होण्याची संधी मिळाली नाही, याची खंत कदाचित त्यांच्या मनात असेल; मात्र त्यापेक्षा कितीतरी मोठे समाधान त्यांनी मिळवले आहे. कारण करोडपतीच्या मंचापर्यंत पोहोचण्यासाठी लागणारी जिद्द, मेहनत आणि आत्मविश्वास त्यांनी प्रत्यक्ष कृतीतून सिद्ध केला आहे.
२००२ मध्ये पाहिलेले स्वप्न २०२६ मध्ये जगता आले, हीच त्यांच्या आयुष्यातील खरी कमाई असल्याचे ते सांगतात. या यशस्वी प्रवासासाठी त्यांनी सोनी मराठी आणि ‘कोण होणार करोडपती’च्या संपूर्ण टीमचे आभार मानले आहेत. करंजी, गोंडपिपरी, चंद्रपूर आणि महाराष्ट्रभरातील हितचिंतकांनी दिलेल्या प्रेमाबद्दलही त्यांनी कृतज्ञता व्यक्त केली.
त्यांच्या या प्रवासातून एकच संदेश मिळतो—स्वप्न मोठी असण्यासाठी गाव मोठे असण्याची गरज नसते; गरज असते ती स्वप्न पूर्ण करण्याची जिद्द, चिकाटी आणि स्वतःवरच्या विश्वासाची! त्यांच्या या उल्लेखनीय यशाबद्दल सर्व स्तरांतून अभिनंदनाचा वर्षाव होत आहे.



