२९ सप्टेंबरला भद्रावतीत रोजगार मेळावा

चांदा ब्लास्ट प्रतिनिधी. अतुल कोल्हे

     “युवाशक्ती हीच राष्ट्रशक्ती” या संकल्पनेला अनुसरून बेरोजगार युवक-युवतींना रोजगाराच्या संधी उपलब्ध करून देण्यासाठी साई खाजगी औद्योगिक प्रशिक्षण संस्था, भद्रावती आणि जिल्हा कौशल्य विकास, रोजगार व उद्योजकता मार्गदर्शन केंद्र, चंद्रपूर यांच्या संयुक्त विद्यमाने मंगळवार, दि. २९ सप्टेंबर २०२६ रोजी रोजगार मेळावा (प्लेसमेंट ड्राईव्ह) आयोजित करण्यात येणार आहे.

या रोजगार मेळाव्यात विविध नामांकित आस्थापनांना सहभागी करून घेण्यात येणार असून, पात्र उमेदवारांची प्रत्यक्ष मुलाखतीद्वारे निवड केली जाणार आहे. औद्योगिक प्रशिक्षण संस्थांमधून प्रशिक्षण घेतलेल्या तसेच रोजगाराच्या शोधात असलेल्या युवक-युवतींना या उपक्रमाचा लाभ मिळणार आहे.

युवकांना त्यांच्या कौशल्य व शैक्षणिक पात्रतेनुसार रोजगाराच्या संधी उपलब्ध करून देणे, हा या मेळाव्याचा प्रमुख उद्देश आहे. विविध आस्थापनांशी समन्वय साधून अधिकाधिक उमेदवारांना रोजगार मिळवून देण्यासाठी प्रयत्न करण्यात येणार आहेत.

या रोजगार मेळाव्यासाठी संबंधित शासकीय विभाग, औद्योगिक आस्थापना व विविध संस्थांचे सहकार्य लाभणार असून, युवकांनी मोठ्या संख्येने सहभागी होऊन या संधीचा लाभ घ्यावा, असे आवाहन आयोजकांकडून करण्यात आले आहे.

“कौशल्याला संधी, युवकांना रोजगार आणि राष्ट्राच्या प्रगतीला बळ” या उद्देशाने आयोजित करण्यात येणारा हा रोजगार मेळावा युवकांच्या उज्ज्वल भविष्यासाठी महत्त्वपूर्ण ठरणार आहे.—सर्व विद्यार्त्यानी याचा लाभ घ्यावा असे आव्हान संस्थेचे संचांलक किशोर पत्तीवार यांनी केले आहे*