पीएच.डी. पदवी संपादनाबद्दल RCERT चे प्राध्यापक डॉ. अमित एन. अक्केवार यांचा सत्कार
या सत्कार समारंभाच्या अध्यक्षस्थानी महाविद्यालयाचे प्राचार्य डॉ. अनिल झेड. चिताडे होते. त्यांच्या हस्ते विद्युत अभियांत्रिकी विभागातर्फे डॉ. अमित एन. अक्केवार यांचा शाल, सन्मानचिन्ह व पुष्पगुच्छ देऊन गौरव करण्यात आला. यावेळी विद्युत अभियांत्रिकी विभागाचे प्रमुख डॉ. आर. के. धात्रक यांची प्रमुख उपस्थिती होती.
प्राचार्य डॉ. अनिल झेड. चिताडे यांनी डॉ. अक्केवार यांचे अभिनंदन करत त्यांच्या संशोधनातील यशाचे कौतुक केले. त्यांनी सांगितले की, प्राध्यापकांचे संशोधन क्षेत्रातील योगदान हे महाविद्यालयाच्या शैक्षणिक गुणवत्तेला नवी उंची देणारे असून विद्यार्थ्यांसाठी प्रेरणादायी आहे. संशोधनाची परंपरा अधिक सक्षम करण्यासाठी असे यश अत्यंत महत्त्वपूर्ण असल्याचे त्यांनी नमूद केले. यावेळी विभागप्रमुख डॉ. आर. के. धात्रक यांनीही डॉ. अक्केवार यांचे अभिनंदन करून त्यांच्या पुढील शैक्षणिक, संशोधन व व्यावसायिक वाटचालीसाठी शुभेच्छा दिल्या.
या कार्यक्रमात प्रो. धनंजय मेश्राम यांनीही डॉ. अमित एन. अक्केवार यांचे अभिनंदन करून त्यांच्या भावी वाटचालीसाठी शुभेच्छा व्यक्त केल्या. कार्यक्रमास विद्युत अभियांत्रिकी विभागातील प्राध्यापक, कर्मचारी व सहकाऱ्यांची उपस्थिती लाभली. उपस्थितांनी डॉ. अक्केवार यांना पीएच.डी. पदवी प्राप्त झाल्याबद्दल शुभेच्छा देत त्यांच्या उज्ज्वल भवितव्यासाठी सदिच्छा व्यक्त केल्या.
