राज्यातील बाल वैज्ञानिकांची झेप आता थेट नासापर्यंत

चांदा ब्लास्ट प्रतिनिधी. अविनाश नागदेवे

‘मुख्यमंत्री विद्यार्थी विज्ञान वारी’ शासन निर्णय जारी

वर्धा : राज्यातील विद्यार्थ्यांमध्ये वैज्ञानिक दृष्टिकोन रुजावा आणि त्यांना जागतिक दर्जाच्या संशोधन संस्थांचा प्रत्यक्ष अनुभव मिळावा, यासाठी शालेय शिक्षण राज्यमंत्री डॉ. पंकज भोयर यांनी प्रयत्न करून पाठपुरावा केलेल्या ‘मुख्यमंत्री विद्यार्थी विज्ञान वारी’ या अभिनव उपक्रमाचा शासन निर्णय जारी करण्यात आला आहे.

या निर्णयामुळे राज्यातील ग्रामीण व शहरी भागातील गुणवंत विद्यार्थ्यांचा अमेरिकेतील नासा आणि भारतातील इस्रो या नामवंत संस्थांना भेट देण्याची संधी मिळणार आहे. राष्ट्रीय शिक्षण धोरण २०२० च्या उद्दिष्टांना अनुसरून राज्यातील शिक्षण पद्धतीत प्रयोगशीलता आणि संशोधनवृत्ती वाढवण्यासाठी शालेय शिक्षण राज्यमंत्री डॉ.पंकज भोयर सातत्याने प्रयत्नशील होते. त्यांच्या संकल्पनेतून साकारलेल्या या उपक्रमामुळे आता विद्यार्थ्यांना केवळ पुस्तकी ज्ञान न मिळता प्रत्यक्ष कृतीतून विज्ञानाचे धडे मिळणार आहेत.

शासन निर्णयातील महत्त्वाच्या बाबी

राज्यातील तालुका स्तरावरील विज्ञान प्रदर्शनात प्रथम येणाऱ्या २१४८ विद्यार्थी आणि २० पर्यवेक्षकांसाठी नजीकच्या विज्ञान केंद्राची (नागपूर, पुणे किंवा मुंबई) सहल आयोजित केली जाईल. यासाठी प्रति व्यक्ती २० हजार रुपये खर्च जिल्हा नियोजन समितीमधून (डीपीडीसी) करण्यात येईल.

जिल्हा स्तरावर निवड झालेल्या १८० विद्यार्थ्यांना आणि ८ शिक्षकांना बंगळूरू येथील इस्रो केंद्राला भेट देण्यासाठी शासन निर्णयान्वये मंजुरी देण्यात आली आहे. यासाठी प्रति व्यक्ती २५ हजार रुपये खर्च निर्धारित केला आहे. यामध्ये सर्वसाधारण, दिव्यांग आणि आदिवासी अशा सर्व गटांतील विद्यार्थ्यांचा समावेश आहे.

राज्यस्तरीय प्रदर्शनातील उत्कृष्ट ५१ बाल वैज्ञानिक आणि ४ अधिकारी अशा एकूण ५५ जणांना अमेरिकेतील नासा केंद्राच्या ८ दिवसांच्या भेटीसाठी पाठवण्यात येईल. यासाठी प्रति व्यक्ती ६ लाख रुपये याप्रमाणे एकूण ३ कोटी ३० लक्ष रुपयांच्या खर्चास शासन निर्णयाद्वारे मान्यता देण्यात आली आहे.

*पारदर्शक निवड प्रक्रिया आणि जबाबदारी*

शालेय शिक्षण राज्यमंत्री डॉ.पंकज भोयर यांच्या सूचनेनुसार, या वारीसाठी विद्यार्थ्यांची निवड करण्यासाठी तालुका स्तरावर गट शिक्षणाधिकारी, जिल्हा स्तरावर मुख्य कार्यकारी अधिकारी आणि राज्य स्तरावर संचालक यांच्या अध्यक्षतेखाली समित्या गठित करण्यात आल्या आहेत. या संपूर्ण उपक्रमाचे संनियंत्रण राज्य विज्ञान शिक्षण संस्था, नागपूर यांच्याकडे सोपवण्यात आले आहे.

*विद्यार्थ्यांना नासासारख्या संस्थेत जाण्याची संधी – डॉ.भोयर*

या निर्णयाबद्दल राज्यमंत्री डॉ. पंकज भोयर म्हणाले की, शासन निर्णय हा राज्यातील विद्यार्थ्यांच्या स्वप्नांना पंख देणारा आहे. ग्रामीण भागातील विद्यार्थ्यालाही नासासारख्या संस्थेत जाण्याची संधी मिळावी, हा आमचा मुख्य उद्देश होता. या उपक्रमातून भविष्यातील वैज्ञानिक घडतील, असा मला विश्वास आहे.