“चर्चेला प्राधान्य, पण लढा कायम!” — शेतकरी योद्धा कृती समितीचा इशारा

चांदा ब्लास्ट प्रतिनिधी. प्रा. अशोक डोईफोडे

 देऊळगाव राजा, सिंदखेड राजा आणि लोणार या तीन तालुक्यांतील शेतकऱ्यांच्या पिक विमा प्रश्नाने गंभीर स्वरूप धारण केले असून, या पार्श्वभूमीवर आजपासून सिंदखेडराजा येथील तहसील कार्यालयासमोर आमरण उपोषण सुरू होणार होते. मात्र, आंदोलनाच्या उंबरठ्यावर असतानाच कृषिमंत्री दत्तामामा भरणे यांनी चर्चेची तयारी दर्शवली असून, शेतकरी योद्धा कृती समितीच्या शिष्टमंडळाला , 30 एप्रिल रोजी चर्चेसाठी वाशिम येथे आमंत्रित करण्यात आले आहे.

या सकारात्मक घडामोडीमुळे समितीने आजचे उपोषण तात्पुरते स्थगित करण्याचा निर्णय घेतला आहे. हा निर्णय केवळ चर्चेला संधी देण्यासाठी घेतला असून, आंदोलन मागे घेतलेले नसल्याचे समितीने स्पष्ट केले आहे.

सिंदखेडराजा, देऊळगाव राजा व लोणार तालुक्यातील शेतकऱ्यांना गेल्या हंगामातील पिक नुकसानीसाठी अपेक्षित विमा भरपाई वेळेत मिळालेली नाही. अनेक प्रकरणांमध्ये विमा कंपन्यांकडून तांत्रिक कारणे पुढे करून दावे प्रलंबित ठेवण्यात आल्याची तक्रार आहे. यामुळे आर्थिक संकटात सापडलेल्या शेतकऱ्यांमध्ये तीव्र असंतोष निर्माण झाला आहे.

या पार्श्वभूमीवर शेतकरी योद्धा कृती समितीच्या माध्यमातून तीनही तालुक्यांतील शेतकरी एकत्र आले असून, मागील काही दिवसांपासून आंदोलनाची जोरदार तयारी सुरू होती. विविध गावांमध्ये बैठका घेऊन शेतकऱ्यांना संघटित करण्यात आले आणि अखेर आमरण उपोषणाचा निर्णय घेण्यात आला होता.

मात्र, प्रशासनाने वेळीच हस्तक्षेप करत चर्चेचा मार्ग स्वीकारला. कृषिमंत्री दत्तामामा भरणे यांच्या कार्यालयाशी संपर्क साधल्यानंतर शिष्टमंडळाला 30 एप्रिल रोजी वाशिम येथे चर्चेसाठी बोलावण्यात आले आहे. या बैठकीत पिक विमा दावे, नुकसान भरपाई आणि विमा प्रक्रियेत सुधारणा यासंदर्भात सविस्तर चर्चा होण्याची अपेक्षा व्यक्त केली जात आहे.

समितीच्या वतीने सांगण्यात आले आहे की, उद्याच्या बैठकीत शेतकऱ्यांच्या सर्व मागण्या ठामपणे मांडल्या जाणार आहेत. प्रलंबित विमा दावे तात्काळ मंजूर करणे, नुकसानग्रस्त शेतकऱ्यांना योग्य भरपाई देणे आणि विमा प्रक्रियेत पारदर्शकता आणणे या प्रमुख मागण्यांवर भर दिला जाणार आहे.

दरम्यान, शेतकरी योद्धा कृती समितीने प्रशासनाला स्पष्ट इशारा दिला आहे की, जर चर्चेत समाधानकारक निर्णय झाला नाही, तर आंदोलन पुन्हा सुरू करण्यात येईल आणि ते अधिक तीव्र स्वरूपात उभे केले जाईल. पुढील आंदोलनाची दिशा पत्रकार परिषदेत जाहीर करण्यात येणार असल्याचेही त्यांनी स्पष्ट केले आहे.

सिंदखेडराजा, देऊळगाव राजा आणि लोणार तालुक्यातील शेतकऱ्यांचे लक्ष आता वाशिम येथे होणाऱ्या या महत्त्वाच्या बैठकीकडे लागले असून, या चर्चेतून ठोस निर्णय होईल का, याबाबत उत्सुकता निर्माण झाली आहे.

शेवटी समितीने आपली भूमिका ठामपणे मांडली —

“चर्चा हवी, पण न्याय न मिळाल्यास लढा अधिक तीव्र होईल!”