महामार्गांवर सुरजागडच्या ट्रकांची अवैध पार्किंग

चांदा ब्लास्ट प्रतिनिधी. राजेश डोंगरे

 प्रशासनाकडून कडक कारवाईची मागणी

गोंडपिपरीसह परिसरातील विठ्ठलवाडा, तारसा बुज वळणमार्ग तसेच तारसा खुर्द शाळा परिसरात प्रमुख राज्य व राष्ट्रीय महामार्गांवर ट्रक, हायवा आणि इतर जड वाहनांची अवैध पार्किंग ही गंभीर समस्या बनत चालली आहे. रस्त्याच्या कडेला, वळणांवर तसेच पुलाजवळ अनियमितपणे उभी केलेली वाहने अपघातांना आमंत्रण देत असून, यामुळे वाहनचालकांच्या सुरक्षेवर प्रश्नचिन्ह निर्माण झाले आहे.

विशेषतः रात्रीच्या वेळी परावर्तक चिन्हांचा अभाव असल्याने उभी असलेली वाहने सहज लक्षात येत नाहीत. परिणामी अचानक समोर आलेल्या ट्रकांमुळे अनेक लहान-मोठे अपघात घडत आहेत. अलीकडील काही दिवसांत अशा घटनांमध्ये वाढ झाली असून, काही ठिकाणी जीवितहानीच्या घटनाही समोर आल्या आहेत. त्यामुळे स्थानिक नागरिकांमध्ये भीतीचे वातावरण निर्माण झाले आहे.

महामार्गांवर वाढती वाहतूक आणि त्यात भर म्हणून अवैध पार्किंगमुळे वाहतूक कोंडीचे प्रमाणही वाढत आहे. आपत्कालीन सेवांना देखील अडथळे निर्माण होत असून, ऑम्ब्युलन्ससारख्या वाहनांना वेळेवर मार्ग मिळत नाही. या समस्येमुळे सर्वसामान्य नागरिक, प्रवासी आणि वाहनचालक त्रस्त झाले आहेत.

यावर उपाय म्हणून संबंधित प्रशासनाने तातडीने कडक पावले उचलण्याची गरज व्यक्त केली जात आहे. ट्रकांसाठी स्वतंत्र पार्किंग झोन तयार करणे, नो-पार्किंग नियमांची कठोर अंमलबजावणी, तसेच वाहतूक पोलिसांकडून नियमित गस्त वाढवणे आवश्यक आहे. नियमांचे उल्लंघन करणाऱ्यांवर दंडात्मक कारवाई केल्यासच ही समस्या आटोक्यात येऊ शकते.

दरम्यान, नागरिकांनीही सुरक्षिततेच्या दृष्टीने वाहतूक नियमांचे पालन करणे गरजेचे असून, प्रशासन आणि नागरिकांच्या संयुक्त प्रयत्नातूनच या वाढत्या धोक्यावर नियंत्रण मिळवणे शक्य होणार आहे.तेव्हा प्रशासनाने ठोस पावले उचलून महामार्गवरील सुरजागड व कोणसरी लोहखनिजाच्या वाहणांना स्वातंत्र्य पार्किंग द्यावी व रोडवर उभ्या असलेल्या ट्रक चालकावर दांडात्मक कारवाही करावी, अशी मागणी सामाजिक कार्यकर्ते राजकपूर भडके यांनी निवेदनाद्वारे केली आहे.