महामानव डॉ. बाबासाहेब आंबेडकर यांच्या जयंतीनिमित्त चंद्रपूर शहर जिल्हा काँग्रेस कमिटीतर्फे विनम्र अभिवादन
चांदा ब्लास्ट
चंद्रपूर :_ “भारतीय राज्यघटनेचे शिल्पकार भारतरत्न डॉ. बाबासाहेब आंबेडकर यांनी देशाला दिलेले संविधान हे केवळ कायदेशीर दस्तऐवज नसून ते कोट्यवधी भारतीयांच्या प्रगतीचे आणि सन्मानाचे साधन आहे. आज त्यांच्या जयंतीनिमित्त अभिवादन करताना आपल्याला त्यांनी दिलेल्या समता, स्वातंत्र्य आणि बंधुभावाच्या मूल्यांचे स्मरण करणे आवश्यक आहे. बाबासाहेबांच्या विचारांमुळेच देशातील शेवटच्या घटकाला मुख्य प्रवाहात येण्याची संधी मिळाली आहे,” असे प्रतिपादन चंद्रपूर शहर (जिल्हा) काँग्रेस कमिटीचे अध्यक्ष संतोष लहामगे यांनी केले.
यावेळी काँग्रेस जेष्ठ नेते विनोद दत्तात्रय, काँग्रेस नेते प्रवीण पडवेकर, सुभाष गौस, माजी महापौर तथा नगरसेविका संगीता अमृतकर, नगरसेविका संगीता भोयर, मीनाक्षी गुजरकर, माजी नगरसेवक गोपाल अमृतकर, अनुताई दहेगावकर, मनीष तिवारी, मनीष दास, अंकित रामटेके यांची उपस्थिती होती.
लहामगे पुढे म्हणाले की, “सध्याच्या परिस्थितीत संविधानासमोर अनेक आव्हाने उभी आहेत. लोकशाहीची मूल्ये धोक्यात येत असताना, बाबासाहेबांनी दाखवलेल्या मार्गावर चालणे हीच काळाची गरज आहे. काँग्रेस पक्षाने नेहमीच संविधानाच्या रक्षणाची भूमिका घेतली असून, डॉ. बाबासाहेब आंबेडकरांच्या स्वप्नातील भारत घडवण्यासाठी आम्ही शेवटच्या श्वासापर्यंत लढा देऊ. समाजातील प्रत्येक घटकाला न्याय मिळवून देणे, हेच आमचे मुख्य ध्येय आहे.”
“बाबासाहेबांनी दिलेला ‘शिका, संघटित व्हा आणि संघर्ष करा’ हा मंत्र आजही तितकाच प्रेरणादायी आहे. विशेषतः तरुणांनी केवळ उत्सवापुरते मर्यादित न राहता बाबासाहेबांचे साहित्य आणि त्यांचे विचार आत्मसात केले पाहिजेत. केवळ सामाजिक क्रांतीच नव्हे, तर शैक्षणिक आणि आर्थिक प्रगतीसाठी सुद्धा त्यांचे विचार मार्गदर्शक ठरतात. चंद्रपूर शहर काँग्रेसतर्फे आम्ही नेहमीच अशा महान विचारांचा प्रचार आणि प्रसार करण्यासाठी विविध उपक्रम राबवत असतो,” असेही त्यांनी नमूद केले.
शेवटी उपस्थित पदाधिकारी आणि कार्यकर्त्यांशी संवाद साधताना संतोष लहामगे यांनी आवाहन केले की, “आजच्या या पावन दिनी आपण सर्वांनी संविधान सुरक्षित ठेवण्याची आणि सामाजिक सलोखा जपण्याची शपथ घेऊया. डॉ. बाबासाहेब आंबेडकरांचे विचार हीच आपली खरी शक्ती आहे आणि त्या शक्तीच्या जोरावरच आपण एक समृद्ध समाज घडवू शकतो.” या कार्यक्रमाला चंद्रपूर शहर काँग्रेसचे सर्व सेलचे पदाधिकारी आणि मोठ्या संख्येने कार्यकर्ते उपस्थित होते.
चंद्रपूर शहर (जिल्हा) काँग्रेस कमिटी, चंद्रपूर तर्फे भारतरत्न महामानव डॉ. बाबासाहेब आंबेडकर यांच्या जयंतीनिमित्त अभिवादन करण्यात आले.
