घुग्घुसमध्ये चालकांचा संताप उसळला

चांदा ब्लास्ट

घुग्घुस, चंद्रपूर : नगर परिषद क्षेत्रात कार्यरत चालकांनी सोमवार, दिनांक 02.03.2026 रोजी नगर परिषद कार्यालयात नगराध्यक्षा दीप्ती सोनटक्के तसेच अर्थ, नियोजन व सांस्कृतिक विभागाचे सभापती रविश सिंग यांना लेखी निवेदन देत SLPL कंपनी व्यवस्थापनाविरोधात गंभीर आरोप केले आहेत.

चालकांचे म्हणणे आहे की ते वर्ष 2023 पासून सातत्याने काम करत आहेत. त्यांच्या जवळ SLPL कंपनीचे वैध ओळखपत्र (ID कार्ड) व पेमेंट बॅक स्टेटमेंट उपलब्ध आहेत. तरीदेखील कंपनी त्यांना स्वतःचे कर्मचारी मानण्यास नकार देत आहे. “तुम्ही या कंपनीचे कामगार नाही” असे सांगून मानसिक छळ केला जात असल्याचा आरोप चालकांनी केला आहे.

याशिवाय, सर्व चालक घुग्घुसचे रहिवासी असतानाही त्यांना “गावचे मूळ रहिवासी नाही” असा ठपका ठेवून “गावद्रोही” सारखे अपमानास्पद शब्द वापरले जात असल्याचेही त्यांनी सांगितले. हा प्रकार केवळ अपमानकारक नसून त्यांच्या अधिकारांचे उल्लंघन असल्याचे चालकांनी नमूद केले आहे.

पूर्वीही दिले होते निवेदन

चालकांनी सांगितले की दिनांक 08.02.2026 रोजी त्यांनी दिवाळी बोनस, शासन निर्णय (GR) नुसार वेतन आणि इतर थकीत बाबींविषयी लेखी निवेदन दिले होते. त्यावेळी कंपनीने बैठकीत सहमती दर्शवली होती; मात्र अद्याप प्रत्यक्षात कोणतेही भुगतान झालेले नाही.

यानंतर पुन्हा चर्चा व लेखी सहमती होऊनही कंपनीने आश्वासन पूर्ण केले नाही. त्यामुळे चालकांमध्ये तीव्र नाराजी असून आर्थिक अडचणी निर्माण झाल्या आहेत.

23 फेब्रुवारीच्या बैठकीतही तोडगा नाही

23.02.2026 रोजी चालक प्रतिनिधी व कंपनी व्यवस्थापन यांच्यात अंतिम बैठक झाली होती. त्यात खालील मागण्यांवर निर्णय घेण्याची मागणी करण्यात आली होती —

1. थकीत दिवाळी बोनसचे तात्काळ भुगतान

2. GR नुसार थकीत वेतनाचा भरणा

3. ज्या चालकांना GR लागू करण्यात आलेला नाही, त्यांना तातडीने लागू करणे

4. पूर्वीच्या बैठकीतील आश्वासनांची लेखी अंमलबजावणी

चालकांनी स्पष्ट इशारा दिला होता की भुगतान प्रक्रिया त्वरित सुरू न झाल्यास ते सामूहिक व कायदेशीर पावले उचलतील, ज्याची संपूर्ण जबाबदारी कंपनीची राहील.

प्रशासनाच्या भूमिकेवर प्रश्नचिन्ह

वारंवार निवेदन देऊनही कंपनीविरोधात ठोस कारवाई न झाल्याने शासन-प्रशासनाच्या भूमिकेवर प्रश्न उपस्थित होत आहेत. काही चालकांच्या मते प्रशासनाची भूमिका “कंपनीच्या बाजूने झुकलेली” वाटत आहे.

या प्रकरणी नगराध्यक्षा दीप्ती सोनटक्के आणि सभापती रविश सिंग यांनी SLPL कंपनी व्यवस्थापन तसेच Western Coalfields Limited (WCL) च्या अधिकाऱ्यांना नगर परिषद कार्यालयात बोलावून बैठक घेण्याचे आश्वासन दिले आहे. चालकांना दोन दिवस प्रतीक्षा करण्यास सांगण्यात आले होते.

मात्र, ही बातमी लिहिली जात असताना SLPL कंपनी व्यवस्थापन किंवा WCL कडून कोणतेही अधिकृत स्पष्टीकरण समोर आलेले नाही.

आता प्रस्तावित बैठकीत चालकांच्या प्रश्नांवर तोडगा निघतो का, की वाद आणखी चिघळतो, याकडे सर्वांचे लक्ष लागले आहे. सध्या घुग्घुसमध्ये या प्रकरणामुळे संताप आणि असंतोषाचे वातावरण निर्माण झाले आहे.