वाळू माफियांचा गोरखधंदा उघडकीस : एकाच नंबर प्लेटवर दोन ट्रक ; 75 लाखांचा मुद्देमाल जप्त

चांदा ब्लास्ट प्रतिनिधी. अविनाश नागदेवे

वर्धा :_ जिल्ह्यात अवैध वाळू तस्करीचा मोठा प्रकार उघडकीस आला असून, एकाच वाहन क्रमांकाचा वापर करून दोन वेगवेगळे ट्रक चालवले जात असल्याचा धक्कादायक प्रकार समोर आला आहे. या प्रकरणी सेलू पोलिसांनी धडक कारवाई करत सुमारे 75 लाख 21 हजार रुपयांचा मुद्देमाल जप्त केला आहे.

राज्य शासनाचा महसूल बुडवणाऱ्या या अवैध व्यवसायामुळे परिसरात खळबळ उडाली आहे. पोलिसांना मिळालेल्या गोपनीय माहितीच्या आधारे सेलू पोलिस स्टेशनच्या पथकाने विश्राम विद्यालय परिसरात नाकाबंदी केली. दरम्यान संशयास्पद स्थितीत उभे असलेले दोन ट्रक पोलिसांच्या निदर्शनास आले.

तपासणीदरम्यान धक्कादायक बाब समोर आली की, दोन्ही ट्रकवर एकाच क्रमांकाची नंबर प्लेट लावण्यात आली होती. ‘एक नंबर – दोन ट्रक’ असा प्रकार पाहून पोलिसही चक्रावले. अधिक चौकशी केली असता ही नंबर प्लेट मजबूत (डुप्लिकेट) बनवून वाळू वाहतुकीसाठी वापरली जात असल्याचे निष्पन्न झाले.

या प्रकरणी पोलिसांनी इरशाद खान अलेक्झांडर खान पठाण (वय 55) व अमित लीलाधर कुरके (वय 55) या दोघांना ताब्यात घेतले असून, ते या अवैध वाळू वाहतुकीचे मुख्य सूत्रधार असल्याचा संशय आहे.

पोलिसांनी कारवाईत दोन वाळूने भरलेले ट्रक मजबूत बनावटीच्या नंबर प्लेट बनावट कागदपत्रे असा एकूण 75,21,000 रुपयांचा मुद्देमाल जप्त केला आहे. याप्रकरणी संबंधित कलमान्वये गुन्हा दाखल करण्यात आला असून, पुढील तपास सेलू पोलिसांकडून सुरू आहे.

या प्रकरणामागे मोठे वाळू तस्करीचे नेटवर्क कार्यरत असल्याचा संशय पोलिसांनी व्यक्त केला असून, या रॅकेटमधील इतर आरोपी व मालकांपर्यंत पोहोचण्यासाठी तपास अधिक वेगाने सुरू आहे. हि कारवाई वर्धा जिल्ह्याचे पोलिस अधीक्षक सौरभकुमार अग्रवाल वर्धा तसेच अप्पर पोलीस अधीक्षक सदाशिव वाघमारे वर्धा उपविभागीय पोलिस अधिकारी प्रमोद मकेश्वर वर्धा यांच्या मार्गदर्शनाखाली सेलू पोलिस स्टेशनचे ठाणेदार देवेंद्र ठाकुर सहाय्यक फौजदार निरंजन वरभे जावेद धामिया पोलिस हवालदार तुषार भुते मंगेश राऊत पोलिस शिपाई गंगाधर तांबारे दिनेश चव्हाण तपासीय अधिकारी पोलिस उपनिरीक्षक प्रितम निमगडे आणि सेलू पोलिस स्टेशनचे पोलीस कर्मचारी.