74 वी अखिल भारतीय पोलीस रेसलिंग क्लस्टर स्पर्धा 2025
चांदा ब्लास्ट प्रतिनिधी. अविनाश नागदेवे
74 वी अखिल भारतीय पोलीस रेसलिंग क्लस्टर स्पर्धा 2025 ही नुकतीच मधुबन, हरियाणा येथे पार पडली. या स्पर्धेत वर्धा जिल्हा पोलीस दलातील महिला पोलीस अंमलदार सुनैना डोंगरे हिने उत्कृष्ट कामगिरी करत सुवर्ण पदक संपादन केले. तिच्या या उल्लेखनीय कामगिरीमुळे महाराष्ट्र पोलीस दल, नागपूर परिक्षेत्र तसेच वर्धा जिल्ह्याचा मान अधिक उंचावला आहे.
दिनांक 29 सप्टेंबर 2025 रोजी मुंबई येथे महाराष्ट्र राज्य पोलीस महासंचालक कार्यालयात महाराष्ट्र पोलीस दलाचे प्रतिनिधित्व करून राष्ट्रीय आणि आंतरराष्ट्रीय स्तरावर पदकप्राप्त कामगिरी करणाऱ्या पोलीस अधिकारी, अंमलदार, खेळाडू आणि प्रशिक्षकांचा सत्कार सोहळा आयोजित करण्यात आला होता. या प्रसंगी सुनैना डोंगरे हिचा देखील मान्यवरांच्या उपस्थितीत सत्कार करण्यात आला. विशेष पोलीस महानिरीक्षक नागपूर परिक्षेत्र नागपूर श्री संदीप पाटील साहेब वर्धा जिल्हा पोलीस प्रमुख श्री. अनुराग जैन (पोलीस अधीक्षक, वर्धा), श्री. सदाशिव वाघमारे (अपर पोलीस अधीक्षक), श्री. विनोद चौधरी (पोलीस निरीक्षक, स्था. गु. शा.) तसेच प्रशिक्षक श्री. राजू उमरे यांनी सुनैना डोंगरे हिच्या उल्लेखनीय क्रीडा यशाबद्दल तिला अभिनंदन करून सत्कार केला.
सुनैना डोंगरे हिने याआधी अमेरिकेत झालेल्या जागतिक पोलीस स्पर्धेत सुवर्णपदक मिळवून भारताचे आणि महाराष्ट्र पोलीस दलाचे नाव जागतिक स्तरावर गौरवल्याचा अभिमान वर्धा जिल्हा पोलिस खात्याला वाटतो. तिच्या या कामगिरीत तिची मेहनत, शिस्त आणि समर्पणभाव स्पष्ट दिसून येतो.
