वरिष्ठ लिपिक सतिश कुळकर्णी यांचा सेवा गौरव सोहळा संपन्न
चांदा ब्लास्ट प्रतिनिधी. प्रा. अशोक डोईफोडे
शिक्षण प्रसारक मंडळ चिखली द्वारा संचालित दीनदयाल विद्यालय व कनिष्ठ कला आणि विज्ञान महाविद्यालय दे.राजा येथे कार्यरत असलेले वरीष्ठ लिपिक सतीश सुधाकर कुळकर्णी हे रविवार दि.३१ ऑगस्ट रोजी नियतवयोमानानूसार सेवा निवृत्त झाले ,त्या निमित्ताने त्यांचा मान्यवरांच्या उपस्थितीत कौटुंबिक सत्कार करण्यात आला. तसेच शिप्रमं चे अध्यक्ष रामकृष्णदादा शेटे,सचिव प्रेमराजसेठ भाला यांच्यासह सर्व संचालक मंडळीनी .सतीश कुलकर्णी यांना पुढील वाटचालीसाठी शुभेच्छा दिल्या.
शिप्रमंचे प्रशासकीय संचालक अरविंदभैय्या शिंगणे यांच्या अध्यक्षतेखाली विद्यालयात हा सेवापूर्ती गौरव सोहळा पार पडला. प्रसंगी शिप्रमंचे संचालक अशोकभाऊ कोटेचा,गोपालजी बोरा,स्थानिक सल्लागार अँड. घनश्यामजी भाला,धर्मराज हनुमंते,छबुराव भावसार,त्र्यंबकराव जायभाये, भगवान कायंदे, माजी प्राचार्य एस.बी.गारडे, माजी पर्यवेक्षक आर.के.डोईफोडे,एस.एन.व्यास, लोकमतचे पत्रकार मुकुंद पाठक,पत्रकार सन्मती जैन,भाजपच्या जिल्हा महिला मोर्चाच्या अध्यक्षा सविता पाटील,शिक्षकेत्तर कर्मचारी संघटनेचे अध्यक्ष राजेंद्र घुबे आदी मान्यवर मंडळी उपस्थित होती.तसेच विद्यालयातील सर्व शिक्षक-शिक्षिका तसेच शिक्षकेत्तर कर्मचारी बंधू भगिनी उपस्थित होत्या. सर्वांनी त्यांनां मनःपूर्वक शुभेच्छा दिल्या.
सत्काराला उत्तर देताना सत्कारमूर्ती सतीश कुलकर्णी यांनी मी,”निष्ठेने आणि प्रामाणिकपणे काम करत राहिलो म्हणुनच संस्थेत ३३ वर्षे इतकी प्रदीर्घ सेवा करू शकलो” असे प्रतिपादन केले.तसेच संस्थेच्या तत्कालीन संचालकांचे आणि संस्थेचे ऋण व्यक्त करतांना सतिश कुळकर्णी यांचे वडील सुधाकर कुळकर्णी यांना गहिवरून आले डबडबलेल्या डोळ्यांनी सर्वांचे आभार मानून त्यांनी सतिश यांना पुढील वाटचालीसाठी शुभेच्छा,आशीर्वाद दिला.
प्राचार्य रामेश्वर कुटे यांनी कार्यक्रमाचे प्रास्ताविक केले, सूत्रसंचालन संदीप डोईफोडे यांनी केले शेवटी पर्यवेक्षक राजेश भिवटे सर यांनी उपस्थितांचे आभार मानले.
