गडचांदूर येथे समता सैनिक दलाचे प्रशिक्षण शिबीर यशस्वीरीत्या संपन्न

चांदा ब्लास्ट प्रतिनिधी. प्रा. अशोक डोईफोडे

ऐतिहासिक बुद्ध भूमी गडचांदूर येथे समता सैनिक दलाचे प्रशिक्षण शिबीर नुकतेच यशस्वीरीत्या संपन्न झाले. या शिबिरात विशेष मार्गदर्शक म्हणून डॉ. बाबासाहेब आंबेडकर यांचे नातजावई, प्रख्यात विचारवंत आणि प्राध्यापक डॉ. आनंद तेलतुंबडे यांनी उपस्थितांना मार्गदर्शन केले. त्यांनी समता सैनिक दलाचा इतिहास, कार्ये, सद्य परिस्थितीत दलाची आवश्यकता तसेच सैनिकांची कर्तव्ये आणि जबाबदाऱ्या यावर सखोल प्रकाश टाकला. त्यांच्या प्रेरणादायी मार्गदर्शनाने शिबिराला विशेष महत्त्व प्राप्त झाले.

या शिबिरात एकूण ३५ नवीन सैनिकांनी सहभाग घेऊन प्रशिक्षण पूर्ण केले. याशिवाय जुन्या सैनिकांचीही लक्षणीय उपस्थिती होती, ज्यामुळे शिबिराला अधिक उत्साह प्राप्त झाला. शिबिराचे उद्घाटन भारतीय बौद्ध महासभेचे चंद्रपूर जिल्हा अध्यक्ष आयु. किशोर तेलतुंबडे यांनी केले, तर अध्यक्षस्थानी आयु. बादल चांदेकर, उपाध्यक्ष संरक्षण विभाग, तालुका शाखा कोरपणा, उपस्थित होते.

विशेष अतिथी आणि प्रशिक्षक: शिबिराला विशेष अतिथी म्हणून प्रा. आयु. आनंद तेलतुंबडे आणि प्राचार्य डॉ. सोमाजी गोंडाणे उपस्थित होते. प्रशिक्षणाची जबाबदारी लेफ्टनंट कर्नल आयु. प्रफुल भगत आणि लेफ्टनंट कर्नल आयु. गुरूबालक मेश्राम यांनी यशस्वीपणे पार पाडली. डिव्हिजन ऑफिसर आयु. साक्षीताई नळे यांनी सहाय्यक म्हणून महत्त्वपूर्ण योगदान दिले.

शिबिरात भारतीय बौद्ध महासभेचे तालुका अध्यक्ष आयु. श्रावण जिवणे (कोरपणा), आयु. दिपक साबणे (जिवती), सरचिटणीस आयु. गिरीष पाझारे (कोरपणा), कोषाध्यक्ष आयु. उत्तम पारेकर (कोरपणा), गडचांदूर शहर अध्यक्ष आयु. पद्माकर खैरे आणि सामाजिक कार्यकर्ते आयु. मधुकर चुनारकर यांची विशेष उपस्थिती होती.

उद्घाटनीय कार्यक्रमाचे संचालन भारतीय बौद्ध महासभा शहर शाखेचे सरचिटणीस आयु. राहुल निरंजने यांनी केले. प्रास्ताविक तालुका शाखेचे सरचिटणीस आयु. गिरीष पाझारे यांनी सादर केले, तर आभार प्रदर्शन गडचांदूर शहर शाखेचे अध्यक्ष आयु. पद्माकर खैरे यांनी केले.

शिबिरात धम्ममित्र सन्मा. आयु. अमित थोरात आणि राठोड सर यांच्या मित्रमंडळींनी दानपारमितेचे पालन करत उपस्थितांना मसालाभात आणि जिलेबीचे वाटप केले. यामुळे शिबिराला सामाजिक बांधिलकीचा एक विशेष आयाम प्राप्त झाला.

या शिबिराने समता सैनिक दलाच्या विचारधारेला आणि कार्याला नवीन दिशा दिली. नवीन सैनिकांना प्रशिक्षणाद्वारे दलाच्या ध्येय-धोरणांची माहिती मिळाली, तर जुन्या सैनिकांना आपली जबाबदारी पुन्हा स्मरण झाली. डॉ. आनंद तेलतुंबडे यांच्या मार्गदर्शनामुळे उपस्थितांमध्ये समता, बंधुता आणि सामाजिक न्यायासाठी कार्य करण्याची प्रेरणा निर्माण झाली.

हे शिबीर गडचांदूरच्या सामाजिक आणि सांस्कृतिक इतिहासात एक महत्त्वाचा टप्पा ठरले असून, यामुळे समता सैनिक दलाच्या कार्याला अधिक बळ मिळेल, असा विश्वास व्यक्त केला जात आहे.