ध्येय लक्षात घेऊनच योग्य शाखा निवडा – प्रा. प्रफुल्ल माहूरे

चांदा ब्लास्ट प्रतिनिधी. प्रा. अशोक डोईफोडे

महात्मा गांधी विद्यालय सोनुर्ली येथे 10 वी च्या विद्यार्थ्यांसाठी भव्य निरोप समारंभाचे आयोजन करण्यात आले. या निरोप समारंभात मुख्याध्यापक बबन भोयर, प्रमुख मार्गदर्शक उपप्राचार्य प्रफुल्ल माहूरे, विश्वनाथ धोटे, श्री येडमे, अनिल मडावी, सलमा कुरेशी आणि इतर शिक्षक उपस्थित होते.

समारंभाची सुरुवात महात्मा गांधीजींच्या प्रतिमेल हार घालून करण्यात आली. 9 वी च्या विद्यार्थ्यांनी 10 वी च्या विद्यार्थ्यांना भावपूर्ण निरोप देऊन आपले मनोगत मांडले तसेच शिक्षकांनीही विद्यार्थ्यांच्या उज्ज्वल भविष्यासाठी शुभेच्छा व्यक्त केल्या. विद्यार्थ्यांच्या मनात मिश्र भावना – आनंद आणि थोडीशी उदासी – उमटली असली, तरीही त्यांच्या चेहऱ्यावर एक नवीन अध्यायाच्या उत्साहाची झलक होती.

समारंभात प्रमुख मार्गदर्शक प्रफुल्ल माहूरे यांनी प्रेरणादायी भाषण दिले. भाषणात त्यांनी 10 वी नंतरच्या आयुष्यातील दिशानिर्देशांवर भर दिला. त्यांनी विद्यार्थ्यांना पुढील शैक्षणिक शाखा निवडताना आपल्या ध्येयाला महत्त्व देण्याचा सल्ला दिला. “ध्येय लक्षात घेऊनच योग्य शाखा निवडा आणि कठोर परिश्रमाचे महत्त्व कधीही विसरू नका,” असे त्यांनी विद्यार्थ्यांना प्रोत्साहन दिले.

 भाषणात जॉर्ज वॉशिंग्टन कार्व्हर यांच्या जीवन परिचयाचा उल्लेख करून, प्रतिकूल परिस्थितीतही यश मिळवण्याची प्रेरणा दिली . त्यांच्या कष्टस्वभाव आणि धैर्याचा आदर्श घेऊन, विद्यार्थ्यांनी प्रत्येक आव्हानाला सामोरे जाण्याची तयारी बाळगावी, असे देखील मार्गदर्शन करण्यात आले.

हा निरोप समारंभ विद्यार्थ्यांच्या उज्ज्वल भविष्यासाठी एक नवे पाऊल ठरला असून, त्यांच्या पुढील शैक्षणिक व जीवनाच्या वाटचालीसाठी प्रेरणादायक ठरणार आहे.