सर्वे क्रमांक 275 मधील सार्वजनिक भूखंडावरील अनधिकृत बांधकाम हटविण्याची मागणी

चांदा ब्लास्ट

घुग्घुस (जि. चंद्रपूर), १३ फेब्रुवारी २०२५:

चंद्रपूर जिल्ह्यातील घुग्घुस परिसरातील सर्वे क्रमांक 275 मधील 10,800 चौरस फूट सार्वजनिक ओपन प्लेस प्लॉटवर अनधिकृत बांधकाम केल्याचा प्रकार उघडकीस आला आहे. ब्रिथ ऑफ लाइफ मल्टीपरपज सोसायटीचे संस्थापक व अध्यक्ष प्रणयकुमार बंडी यांनी या संदर्भात घुग्घुस नगरपरिषदेच्या प्रशासक/मुख्याधिकाऱ्यांना पत्र दिले असून, हे अनधिकृत बांधकाम त्वरित हटवून सार्वजनिक भूखंड नगरपरिषदेच्या ताब्यात घेण्याची मागणी केली आहे.

नियमांच्या विरोधात नोटरीद्वारे विक्री

मिळालेल्या माहितीनुसार, सर्वे क्रमांक 275 मधील 6,300 चौरस फूट आणि 4,500 चौरस फूट असे दोन सार्वजनिक ओपन प्लेस प्लॉट आरक्षित होते. मात्र, या भूखंडांपैकी 6,300 चौरस फूट क्षेत्र जमिनमालकाने सहा लोकांना नोटरीद्वारे विकल्याचा आरोप आहे. ही विक्री पूर्णतः बेकायदेशीर आणि शासकीय नियमांचे उल्लंघन करणारी असल्याचे सांगितले जात आहे.

या प्रकारामुळे शासनासोबतच परिसरातील प्लॉटधारकांनाही आर्थिक नुकसान सहन करावे लागत आहे. त्यामुळे ही अवैध विक्री तत्काळ रद्द करून संबंधितांवर कठोर कायदेशीर आणि फौजदारी कारवाई करण्याची मागणी होत आहे.

नगरपरिषदेकडून सार्वजनिक भूमी ताब्यात घेऊन विकासकामे करण्याची मागणी

नगरपरिषद व शासनाने या वादग्रस्त भूमीवर त्वरित ताबा मिळवून सार्वजनिक हितासाठी विकासकामे करावी, अशी जोरदार मागणी स्थानिक नागरिक व सामाजिक कार्यकर्ते करत आहेत.

सर्वे क्रमांक 275 चा भूगोल:

२२ खासगी प्लॉट – एकूण 72,460 चौरस फूट क्षेत्रफळ

रस्त्यासाठी – 22,760 चौरस फूट क्षेत्र

सार्वजनिक ओपन प्लेस – 10,800 चौरस फूट (4,500+6,300 चौरस फूट)

वादग्रस्त भूखंडाचा परिसर:

अमराई रोड, बहादे प्लॉट, हनुमान मंदिर चौकाजवळ, घुग्घुस.

प्रशासन कोणती पावले उचलणार?

आता सर्वांचे लक्ष याकडे लागले आहे की, प्रशासन या अनधिकृत बांधकामाविरोधात कोणती कारवाई करते आणि कधीपर्यंत हा सार्वजनिक भूखंड नगरपरिषद ताब्यात घेते.