घुग्घूसमध्ये प्रदूषण, आरोग्य आणि स्थानिक रोजगाराच्या प्रश्नांवर प्रशासन सक्रिय

चांदा ब्लास्ट

घुग्घूस :_ नगर परिषदेच्या नियोजन व विकास समिती तसेच सांस्कृतिक कार्य समितीचे सभापती रविश विनय सिंग यांनी ३० एप्रिल २०२६ रोजी जिल्हाधिकारी, राज्याचे कॅबिनेट मंत्री आणि लॉयड्स मेटल्स अँड एनर्जी लिमिटेड यांच्या व्यवस्थापनाला पाठविलेल्या सविस्तर निवेदनाची जिल्हा प्रशासनाने गंभीर दखल घेत संबंधित विभागांना चौकशी करून आवश्यक कार्यवाही करण्याचे निर्देश दिले आहेत. उपलब्ध अधिकृत कागदपत्रांनुसार जिल्हाधिकारी कार्यालय तसेच उपविभागीय अधिकारी (एसडीएम) कार्यालयाने प्रकरणाची चौकशी करून आवश्यक कार्यवाही करावी व त्याबाबतची माहिती अर्जदाराला उपलब्ध करून द्यावी, असे निर्देश जारी केले आहेत.

सभापती रविश विनय सिंग यांनी पाठविलेल्या पत्रात लॉयड्स मेटल्स अँड एनर्जी लिमिटेडच्या औद्योगिक कामकाजामुळे घुग्घूस परिसरात लोखंडी धुळीचे प्रदूषण वाढत असून नागरिकांच्या आरोग्यावर त्याचा विपरीत परिणाम होण्याची शक्यता व्यक्त करण्यात आली आहे. तसेच कंपनी परिसरात अत्याधुनिक एसटीपी (STP) व डब्ल्यूटीपी (WTP) प्रकल्प उभारावेत, कंपनीच्या सीएसआर (CSR) निधीतून बहुविशेषज्ञ (मल्टी-स्पेशालिटी) रुग्णालयाची स्थापना करावी आणि स्थानिक युवकांना प्राधान्याने रोजगार उपलब्ध करून द्यावा, अशी मागणी करण्यात आली आहे.

पत्रात औद्योगिक प्रदूषणाची स्वतंत्र चौकशी करून महाराष्ट्र प्रदूषण नियंत्रण मंडळ (MPCB) मार्फत प्रदूषण लेखापरीक्षण (ऑडिट) करण्यात यावे तसेच प्रदूषण नियंत्रणासाठी आधुनिक डस्ट सप्रेशन सिस्टम बसविण्याची मागणीही करण्यात आली आहे.

जिल्हाधिकारी कार्यालयाचे निर्देश

२ जून २०२६ रोजी जिल्हाधिकारी, चंद्रपूर कार्यालयातून जारी करण्यात आलेल्या पत्रानुसार उपविभागीय अधिकारी (चंद्रपूर), महाराष्ट्र प्रदूषण नियंत्रण मंडळ (MPCB) आणि कंपनी व्यवस्थापनाला सभापतींनी उपस्थित केलेल्या मुद्द्यांवर आवश्यक कार्यवाही करून त्याबाबतचा अहवाल अर्जदाराला उपलब्ध करून देण्याचे निर्देश देण्यात आले आहेत.

एसडीएम कार्यालयाचेही पत्र

त्यानंतर ३ जुलै २०२६ रोजी उपविभागीय अधिकारी (एसडीएम), चंद्रपूर कार्यालयानेही महाराष्ट्र प्रदूषण नियंत्रण मंडळ (MPCB) व कंपनी व्यवस्थापनाला पत्र पाठवून विषयाची चौकशी करून आवश्यक कार्यवाही करावी तसेच केलेल्या कार्यवाहीची माहिती अर्जदार व कार्यालयाला सादर करावी, असे निर्देश दिले आहेत.

प्रमुख मागण्या :

घुग्घूस परिसरातील प्रदूषणाची स्वतंत्र चौकशी व प्रदूषण ऑडिट करण्यात यावे

कंपनी परिसरात आधुनिक STP व WTP प्रकल्प उभारण्यात यावेत.

CSR अंतर्गत बहुविशेषज्ञ रुग्णालयाची स्थापना करण्यात यावी.

स्थानिक युवकांना प्राधान्याने रोजगार देऊन स्थानिक रोजगार कक्षाची स्थापना करावी.

आधुनिक डस्ट सप्रेशन सिस्टम बसवून प्रदूषणावर प्रभावी नियंत्रण ठेवावे.

उपलब्ध अधिकृत कागदपत्रांवरून जिल्हा प्रशासनाने या तक्रारीची दखल घेत संबंधित विभागांना चौकशी व आवश्यक कार्यवाहीचे निर्देश दिल्याचे स्पष्ट होते. मात्र, या पत्रांमध्ये कंपनीविरुद्ध करण्यात आलेल्या आरोपांची पुष्टी करण्यात आलेली नाही. आरोपांची सत्यता संबंधित विभागांच्या चौकशीनंतरच स्पष्ट होणार आहे.

याबाबत नियोजन व विकास समिती तसेच सांस्कृतिक कार्य समितीचे सभापती रविश विनय सिंग यांनी सांगितले की, मागण्यांवर वेळेत कार्यवाही झाली नाही तर जनहितासाठी आंदोलनाचा मार्ग स्वीकारण्याचा विचार केला जाईल.

वृत्त लिहीपर्यंत लॉयड्स मेटल्स अँड एनर्जी लिमिटेडकडून या प्रकरणावर कोणतीही अधिकृत प्रतिक्रिया प्राप्त झालेली नव्हती. कंपनीची भूमिका प्राप्त होताच ती प्रमुखत्वाने प्रसिद्ध करण्यात येईल.