अपघात पाहण्याचा मोह पडला महागात! थांबलेल्या कारच्या रांगेत भरधाव ट्रकची धडक; वाहनांचा चक्काचूर

चांदा ब्लास्ट प्रतिनिधी. प्रा. अशोक डोईफोडे

देऊळगाव राजा : समृद्धी महामार्गावर एका अपघातानंतर दुसऱ्या अपघाताची मालिका घडल्याची धक्कादायक घटना समोर आली आहे. हिवरखेड पूर्णा ते तढेगावदरम्यान चॅनल क्रमांक ३२१.९०० वरील पुलावर सिमेंट मिक्सिंग ट्रक चालकाचे वाहनावरील नियंत्रण सुटल्याने ट्रक बॅरिकेड्सला धडक देऊन पलटी झाला. या अपघातानंतर घटनास्थळी वाहनांच्या रांगा लागल्या. दरम्यान, अपघात पाहण्यासाठी थांबलेल्या कारच्या रांगेत मागून आलेल्या भरधाव ट्रकने जोरदार धडक दिली. त्यामुळे २५ हून अधिक कार एकापाठोपाठ एक आदळून अनेक वाहनांचे मोठ्या प्रमाणात नुकसान झाले. सुदैवाने या भीषण घटनाक्रमात कोणतीही जीवितहानी झाली नाही.

सिमेंट मिक्सिंग ट्रक पुलावरच पलटी

प्राप्त माहितीनुसार, इमरान अन्सारी मिराज अन्सारी (वय २४, रा. पनवेल) हा चालक अमरावती येथून मुंबईच्या दिशेने सिमेंट मिक्सिंग ट्रक घेऊन जात होता. शुक्रवारी सकाळी सुमारे ६.३० वाजताच्या सुमारास हिवरखेड पूर्णा ते तढेगावदरम्यान समृद्धी महामार्गावरील चॅनल क्रमांक ३२१.९०० वरील पुलावर अचानक त्याचे ट्रकवरील नियंत्रण सुटले. त्यामुळे ट्रक महामार्गाच्या बाजूला असलेल्या बॅरिकेड्सला जोरदार धडक देत रस्त्यावर पलटी झाला. या घटनेमुळे महामार्गावरील वाहतुकीत एकच खळबळ उडाली.

अपघात पाहण्यासाठी कारच्या लांबच लांब रांगा!

सिमेंट मिक्सिंग ट्रक पलटी झाल्यानंतर मागून येणाऱ्या काही वाहनांची ट्रकला धडक बसली. दरम्यान, सोनोशी येथील गजानन नागरे हे पुण्याच्या दिशेने जात असताना त्यांनी आपले वाहन थांबवून ट्रकचालकाला बाहेर काढण्यास मदत केली.

अपघातामुळे ट्रकमधील सिमेंट रस्त्यावर सर्वत्र विखुरले गेले होते. त्यामुळे परिसरात धुळीचे साम्राज्य निर्माण होऊन दृश्यमानता कमी झाली होती. अपघातग्रस्त ट्रक बाजूला काढण्यासाठी आणि वाहतुकीला अडथळा होऊ नये म्हणून मागून येणारी वाहने काही काळ थांबविण्यात आली. याचवेळी अपघात नेमका कसा घडला, अपघातग्रस्तांना मदतीची गरज आहे का, हे पाहण्यासाठी अनेक वाहनचालकांनी आपापल्या कार रस्त्यावर थांबवल्या. परिणामी, अपघातस्थळाच्या परिसरात कारच्या लांबच लांब रांगा लागल्या.

मात्र, अपघात पाहण्याच्या उत्सुकतेपोटी थांबलेल्या वाहनचालकांना पुढे आणखी एका मोठ्या अपघाताला सामोरे जावे लागले.

भरधाव ट्रकची कारच्या रांगेला धडक; वाहनांचा चक्काचूर!

कारची रांग महामार्गावर लागलेली असतानाच मागून वेगाने येणाऱ्या एका ट्रकने उभ्या असलेल्या कारना जोरदार धडक दिली. धडक दिल्यानंतर संबंधित ट्रकचालक घटनास्थळावरून पसार झाल्याचे सांगण्यात येते. या जोरदार धडकेमुळे रांगेतील कार एकापाठोपाठ एक पुढील वाहनांवर आदळल्या. परिणामी, अनेक कारचे मोठ्या प्रमाणात नुकसान झाले.

या साखळी अपघातात २५ हून अधिक कारचे नुकसान झाल्याचा प्राथमिक अंदाज व्यक्त केला जात आहे. काही वाहनांचे मोठे नुकसान झाले, तर काही कारचे किरकोळ नुकसान झाले आहे.

काही कारचालक निघून गेल्याने नुकसानीचा नेमका आकडा अस्पष्ट

या संपूर्ण घटनाक्रमात नुकसान झालेल्या वाहनांची निश्चित संख्या अद्याप स्पष्ट झालेली नाही. किरकोळ नुकसान झालेल्या काही कारचालकांनी घटनास्थळावर न थांबता पुढील प्रवास सुरू केल्याचे समजते. त्यामुळे प्रत्यक्षात किती वाहनांचे नुकसान झाले, याची निश्चित माहिती मिळणे कठीण झाले आहे. संबंधित यंत्रणांकडून पाहणी केल्यानंतर नुकसानीचा नेमका आकडा स्पष्ट होण्याची शक्यता आहे.

पोलीस व आरोग्य विभागाची धाव; गंभीर दुखापत नाही

घटनेची माहिती मिळताच पोलीस आणि आरोग्य विभागाच्या पथकांनी तातडीने घटनास्थळी धाव घेतली. अपघातातील किरकोळ जखमींना वैद्यकीय उपचार देण्यात आले. सुदैवाने या संपूर्ण घटनाक्रमात कोणालाही गंभीर दुखापत झाली नसल्याने मोठा अनर्थ टळला.

दरम्यान, अपघातग्रस्त ट्रक आणि कार महामार्गाच्या बाजूला हटविण्याचे काम हाती घेण्यात आले. वाहतुकीचा खोळंबा होऊ नये, यासाठी पोलिसांनी खबरदारी घेत एका बाजूने वाहतूक सुरू ठेवली.

अपघात पाहण्यासाठी वाहन थांबविणे ठरू शकते जीवघेणे!

समृद्धी महामार्गावर घडलेल्या या घटनाक्रमाने महामार्गावरील प्रवाशांच्या सुरक्षिततेचा प्रश्न पुन्हा ऐरणीवर आणला आहे. महामार्गावर एखादा अपघात घडल्यास केवळ उत्सुकतेपोटी आपले वाहन रस्त्यावर थांबवून अपघात पाहणे किती धोकादायक ठरू शकते, याची प्रचिती या घटनेतून आली आहे.

अपघातग्रस्तांना मदत करणे ही निश्चितच माणुसकीची भावना आहे. मात्र, मदत करताना स्वतःची आणि इतर प्रवाशांची सुरक्षितता धोक्यात येणार नाही, याची काळजी घेणेही तितकेच महत्त्वाचे आहे. महामार्गावर विनाकारण वाहने थांबविणे, अपघात पाहण्यासाठी गर्दी करणे आणि वाहतुकीला अडथळा निर्माण करणे टाळणे आवश्यक आहे. अन्यथा एका अपघातातून अनेक अपघातांची साखळी निर्माण होऊन निष्पाप प्रवाशांचे जीव धोक्यात येऊ शकतात..