अल्पवयीन मुलीवरील अत्याचारप्रकरणी आरोपीला २० वर्षांचा सश्रम कारावास!

चांदा ब्लास्ट प्रतिनिधी. राजेश डोंगरे

गोंडपिपरी :_ अल्पवयीन बालिकेवरील अत्याचाराच्या गंभीर प्रकरणात चंद्रपूर न्यायालयाने कठोर भूमिका घेत २६ वर्षीय आरोपीला २० वर्षे सश्रम कारावासाची शिक्षा सुनावली आहे. यासोबतच आरोपीला ६ हजार रुपयांचा दंडही ठोठावण्यात आला आहे. धाबा पोलीस स्टेशन हद्दीतील या प्रकरणात न्यायालयाने दिलेल्या या महत्त्वपूर्ण निकालामुळे बालकांवरील अत्याचार करणाऱ्यांना कठोर कायदेशीर कारवाईचा स्पष्ट संदेश मिळाला आहे.

*पोलिसांच्या तपासाला न्यायालयात यश*

प्राप्त माहितीनुसार, धाबा पोलीस स्टेशन येथे गुन्हा क्रमांक ५/२०२२ अन्वये अल्पवयीन बालिकेवरील अत्याचाराचा गुन्हा दाखल करण्यात आला होता. या गंभीर गुन्ह्याचा तपास राजुराचे तत्कालीन उपविभागीय पोलीस अधिकारी, राजा पवार यांनी केला. तपासादरम्यान आवश्यक पुरावे संकलित करून न्यायालयात दोषारोपपत्र दाखल करण्यात आले. न्यायालयीन प्रक्रियेदरम्यान सादर झालेल्या पुराव्यांच्या आधारे आरोपीचा गुन्हा सिद्ध झाल्यानंतर न्यायालयाने त्याला कठोर शिक्षा सुनावली.

*अतिरिक्त सत्र न्यायाधीशांचा महत्त्वपूर्ण निर्णय*

मा. पी. एम. गुप्ता, अतिरिक्त सत्र न्यायाधीश, चंद्रपूर यांनी या प्रकरणाचा निकाल देताना आरोपीला २० वर्षे सश्रम कारावास व ६ हजार रुपये दंड अशी शिक्षा सुनावली.

*या अधिकाऱ्यांनी बजावली महत्त्वपूर्ण भूमिका*

या प्रकरणात तपास अधिकारी म्हणून राजा पवार यांनी काम पाहिले. सरकारी अभियोक्ता म्हणून ॲड. सुधाकर देगावार यांनी न्यायालयात सरकारची बाजू मांडली. कोर्ट पैरवी अधिकारी सफौ/४५२ सुधाकर आत्माराम कोहपरे, दंडक अधिकारी विरेंद्र केदारे तसेच चंद्रपूर येथील दोषसिद्धी कक्षानेही महत्त्वपूर्ण सहकार्य केले.

*वरिष्ठ अधिकाऱ्यांच्या मार्गदर्शनाखाली कामगिरी*

पोलीस अधीक्षक आयुष नोपाणी, अपर पोलीस अधीक्षक ईश्वर कातकडे आणि उपविभागीय पोलीस अधिकारी, राजुरा यांच्या मार्गदर्शनाखाली ही कामगिरी पार पडली.

*बालकांच्या सुरक्षेसाठी कठोर कायद्यांची अंमलबजावणी आवश्यक*

अल्पवयीन बालकांवरील लैंगिक अत्याचार हे समाजासमोरील गंभीर आव्हान आहे. अशा गुन्ह्यांमध्ये प्रभावी तपास, ठोस पुरावे आणि सक्षम न्यायालयीन बाजू यांची भूमिका अत्यंत महत्त्वाची असते. चंद्रपूर न्यायालयाने दिलेल्या या निकालामुळे बालकांच्या सुरक्षेचा प्रश्न पुन्हा एकदा ऐरणीवर आला असून, अशा गुन्ह्यांविरुद्ध समाजानेही जागरूक राहण्याची गरज अधोरेखित झाली आहे.

  (चंद्रपूर पोलीस विभागाच्या प्रसिद्धीपत्रकावर आधारित वृत्त)