शेती पिकांचे पंचनामे तातडीने पूर्ण करून अहवाल सादर करा — जिल्हाधिकारी डॉ. प्रवीण कुमार देवरे यांचे निर्देश

चांदा ब्लास्ट प्रतिनिधी. प्रा. अशोक डोईफोडे

सिंदखेड राजा तालुक्यात निर्माण झालेली कोरड्या दुष्काळाची परिस्थिती, पावसाच्या ताणामुळे शेती पिकांचे झालेले नुकसान, संभाव्य चारा व पाणीटंचाई तसेच आगामी काळात निर्माण होणाऱ्या विविध प्रश्नांच्या पार्श्वभूमीवर मा. जिल्हाधिकारी डॉ. प्रवीण कुमार देवरे यांच्या अध्यक्षतेखाली तालुक्यातील प्रमुख अधिकाऱ्यांची आढावा बैठक घेण्यात आली.

बैठकीत जिल्हाधिकारी डॉ. देवरे यांनी तालुक्यातील टंचाई परिस्थितीचा सविस्तर आढावा घेतला. शेतकरी, नागरिक आणि पशुधनाला दुष्काळाच्या काळात कोणत्याही प्रकारची अडचण निर्माण होऊ नये, यासाठी सर्व विभागांनी समन्वयाने व तत्परतेने काम करण्याचे निर्देश त्यांनी दिले.

पिकांचे पंचनामे तातडीने पूर्ण करा

पावसाच्या ताणामुळे व कोरड्या दुष्काळामुळे शेती पिकांचे मोठ्या प्रमाणात नुकसान झाले आहे. त्यामुळे तालुक्यातील उर्वरित सर्व शेती पिकांचे पंचनामे तातडीने पूर्ण करून त्याचा अहवाल लवकरात लवकर सादर करावा, असे निर्देश जिल्हाधिकारी डॉ. देवरे यांनी दिले.

पंचनामे करताना एकही नुकसानग्रस्त शेतकरी पंचनाम्यापासून वंचित राहणार नाही, याची विशेष दक्षता घ्यावी. पंचनाम्याची कार्यवाही पारदर्शक, वस्तुनिष्ठ व प्रत्यक्ष नुकसानीच्या आधारे करण्यात यावी, असेही त्यांनी स्पष्ट केले.

चारा व पाण्याचे आतापासूनच नियोजन करा

आगामी काळात पशुधनासाठी चारा व पाण्याची टंचाई निर्माण होण्याची शक्यता लक्षात घेता चारा छावण्या, चारा डेपो तसेच पशुखाद्याची उपलब्धता याबाबत आतापासूनच नियोजन करण्याचे निर्देश देण्यात आले.

पशुधनाच्या संख्येचा व संभाव्य गरजेचा अंदाज घेऊन आवश्यक त्या उपाययोजनांचा कृती आराखडा तयार ठेवावा, असेही जिल्हाधिकाऱ्यांनी सांगितले.

पाणीटंचाईग्रस्त गावांची यादी तयार करा

तालुक्यात संभाव्य पाणीटंचाई निर्माण होणाऱ्या गावांची तातडीने यादी तयार करून आवश्यकतेनुसार टँकरद्वारे पाणीपुरवठा, विहीर अधिग्रहण, नळ योजनांची दुरुस्ती तसेच इतर पर्यायी उपाययोजना करण्याच्या सूचना देण्यात आल्या.

नागरिकांना पिण्याच्या पाण्यासाठी भविष्यात कोणत्याही प्रकारची अडचण निर्माण होणार नाही, यासाठी संबंधित विभागांनी पूर्वनियोजन करावे, असे निर्देश देण्यात आले

टंचाई निवारणासाठी प्रशासन सज्ज

यावेळी जिल्हाधिकारी डॉ. प्रवीण कुमार देवरे यांनी स्पष्ट केले की, «“तालुक्यातील शेतकरी आणि नागरिकांना दुष्काळाच्या काळात सर्वतोपरी मदत करण्यासाठी शासन व प्रशासन कटिबद्ध आहे. टंचाई निवारणाच्या कामात कोणतीही हलगर्जी किंवा दिरंगाई खपवून घेतली जाणार नाही. संभाव्य परिस्थितीचा अंदाज घेऊन आवश्यक त्या उपाययोजना वेळेत पूर्ण कराव्यात.”»

बैठकीस प्रा. संजय खडसे, उपविभागीय अधिकारी; अजित दिवटे, तहसीलदार; अजित बांगर, गटविकास अधिकारी; डॉ. आशिष बोबडे, मुख्याधिकारी; तालुका कृषी अधिकारी भुते ; पशुसंवर्धन विभागाचे अधिकारी भोसले ; पंचायत समिती तसेच सार्वजनिक बांधकाम विभागाचे संबंधित अधिकारी उपस्थित होते.

बैठकीअंती सर्व संबंधित विभागांना दुष्काळ व टंचाई परिस्थितीवर प्रभावीपणे मात करण्यासाठी तातडीने कार्यवाही करून केलेल्या उपाययोजनांचा अहवाल सादर करण्याचे निर्देश देण्यात आले.