लखमापूरच्या कन्यांची क्रीडा क्षेत्रात भरारी: जि. प. शाळेचा मुलींचा कबड्डी संघ तालुकास्तरावर प्रथम!

चांदा ब्लास्ट प्रतिनिधी. प्रा. अशोक डोईफोडे

गडचांदूर :- इच्छाशक्ती आणि जिद्दीच्या जोरावर ग्रामीण भागातील विद्यार्थी कोणत्याही क्षेत्रात मागे राहू शकत नाहीत, हे जिल्हा परिषद उच्च प्राथमिक शाळा, लखमापूरच्या विद्यार्थिनींनी पुन्हा एकदा सिद्ध करून दाखवले आहे. नुकत्याच पार पडलेल्या तालुकास्तरीय शालेय क्रीडा स्पर्धेत लखमापूर शाळेच्या मुलींच्या कबड्डी संघाने उत्कृष्ट खेळाचे प्रदर्शन करत प्रथम क्रमांक पटकावला आहे. आता हा विजयी संघ जिल्हास्तरीय स्पर्धेत तालुक्याचे नेतृत्व करण्यासाठी सज्ज झाला आहे. या घवघवीत यशाने या विद्यार्थिनींनी केवळ आपल्या शाळेचेच नव्हे, तर संपूर्ण तालुक्याचे नाव रोशन केले आहे.

*अंबुजा फाउंडेशन आणि शिक्षकांची मोलाची साथ*
मुलींच्या या थक्क करणाऱ्या यशामागे *अंबुजा फाउंडेशन, उपरवाही* यांचे लाभलेले विशेष सहकार्य अत्यंत महत्त्वाचे ठरले आहे. फाउंडेशनच्या सहकार्यासोबतच शाळेतील शिक्षकांनी घेतलेली कठोर मेहनत, दिलेले योग्य मार्गदर्शन आणि खेळाडूंकडून करवून घेतलेला सातत्यपूर्ण सराव यामुळेच या विद्यार्थिनी इथपर्यंत मजल मारू शकल्या आहेत. शिक्षकांनी लावलेली शिस्त आणि पालकांनी मुलींच्या पाठीशी उभे राहून दिलेला विश्वास यामुळे हे यश साध्य झाले आहे.

*माजी विद्यार्थ्यांचे पाठबळ*
शाळेचा नावलौकिक वाढवणाऱ्या या गुणी खेळाडूंचे कौतुक करण्यासाठी गावकऱ्यांसह शाळेचे माजी विद्यार्थी नेहमीच तत्पर असतात. दरवर्षीप्रमाणे याही वर्षी शाळेच्या माजी विद्यार्थी नी या विजयी संघाचे विशेष अभिनंदन करून, जिल्ह्यावर शाळेचे नाव कोरण्यासाठी जाणाऱ्या या मुलींना मोठे प्रोत्साहन आणि पाठबळ दिले आहे.

*शालेय व्यवस्थापन समिती व गावकऱ्यांकडून अभिनंदनाचा वर्षाव*
अत्यंत अटीतटीच्या झालेल्या या सामन्यांमध्ये प्रतिस्पर्धी संघांवर मात करत वर्चस्व प्रस्थापित करणाऱ्या या विजयी संघाचे आणि त्यांना मार्गदर्शन करणाऱ्या शिक्षकांचे सर्वत्र कौतुक होत आहे. या यशाबद्दल *शालेय व्यवस्थापन समिती, माजी विद्यार्थी संघ, शाळेचे मुख्याध्यापक श्री. विनोद नामदेवराव क्षीरसागर तसेच सर्व शिक्षक वृंद आणि ग्रामस्थांनी* विद्यार्थिनींचे भरभरून कौतुक केले आहे.

आगामी जिल्हास्तरीय कबड्डी स्पर्धेतही लखमापूरच्या या कन्या अशीच सुवर्णमय कामगिरी करत जिल्ह्यावर आपली मोहोर उमटवतील, असा सार्थ विश्वास व्यक्त करत सर्वांनी या संघाला पुढील वाटचालीस हार्दिक शुभेच्छा दिल्या आहेत.