गरजू महिलांना स्वावलंबी करण्याच्या उद्देशाने शिलाई मशीनचे वाटप

चांदा ब्लास्ट

खासदार माननीय श्रीमती प्रतिभाताई बाळूभाऊ धानोरकर यांच्या वाढदिवसानिमित्त सामाजिक बांधिलकी जपत पिपरी, धानोरा व येरुर परिसरात गरजू महिलांना स्वावलंबी करण्याच्या उद्देशाने एकूण ५० शिलाई मशीनचे वाटप करण्यात आले. महिलांच्या आर्थिक सक्षमीकरणासाठी राबविण्यात आलेल्या या उपक्रमाला परिसरातील महिलांचा उत्स्फूर्त प्रतिसाद लाभला.

या उपक्रमामुळे महिलांना घरबसल्या रोजगाराची संधी उपलब्ध होणार असून स्वयंरोजगाराच्या माध्यमातून त्या स्वतःच्या पायावर उभ्या राहू शकणार आहेत. शिलाई मशीनच्या सहाय्याने शिवणकाम, कपड्यांची दुरुस्ती आदी कामे करून महिलांना उत्पन्नाचा शाश्वत स्रोत उपलब्ध होणार आहे. परिणामी कुटुंबाच्या आर्थिक स्थितीतही सकारात्मक बदल घडून येण्यास मदत होणार आहे.

हा सामाजिक उपक्रम चंद्रपूर जिल्हा मध्यवर्ती सहकारी बँकेचे संचालक व काँग्रेसचे ज्येष्ठ नेते दिनेश दादापाटील चोखारे यांच्या वतीने आयोजित करण्यात आला होता. त्यांच्या पुढाकारातून हा उपक्रम यशस्वीपणे पार पडला. शिलाई मशीन प्राप्त झाल्याने महिलांनी समाधान व आनंद व्यक्त करत आयोजकांचे आभार मानले.

कार्यक्रमादरम्यान महिलांच्या सक्षमीकरणासाठी अशा प्रकारचे उपक्रम अधिक प्रमाणात राबविण्याची आवश्यकता असल्याचे मत उपस्थित मान्यवरांनी व्यक्त केले. महिलांना रोजगाराच्या संधी उपलब्ध करून देणे ही काळाची गरज असून अशा उपक्रमांमुळे समाजातील दुर्बल घटकांना आर्थिक व सामाजिक बळ मिळते, असेही यावेळी नमूद करण्यात आले.

या कार्यक्रमाला काँग्रेस पक्षाचे पदाधिकारी व कार्यकर्ते मोठ्या संख्येने उपस्थित होते. यावेळी राष्ट्रीय ओबीसी महासंघाचे महासचिव सामाजिक कार्यकर्ते सचिन राजूरकर , कृषि उत्पन्न बाजार समितीचे संचालक गणेश आवारी, सेवा सह संस्था पिंपरीचे उपाध्यक्ष अतुल मोहितकर, कुंडलिक अडबाले, कमलाकर निब्रड, गजानन खामनकर, विठ्ठल करमरकर, माया मुसळे, वर्षा निब्रड यांच्यासह स्थानिक नागरिकांची लक्षणीय उपस्थिती होती.

खासदार प्रतिभाताई धानोरकर यांच्या वाढदिवसानिमित्त राबविण्यात आलेल्या या उपक्रमामुळे समाजात सकारात्मक संदेश गेला असून सामाजिक बांधिलकी जपत केलेल्या या कार्याचे परिसरात सर्वत्र कौतुक होत आहे.