गडचांदूर प्रभाग ९ : ईव्हीएमचा गोंधळ वाढला

चांदा ब्लास्ट प्रतिनिधी. प्रा. अशोक डोईफोडे

गडचांदूर :_ नगरपरिषदेच्या निवडणुकीदरम्यान प्रभाग ९ मधील आदर्श हिंदी विद्यालय (केंद्र क्रमांक २) येथे आज मोठा गोंधळ उडाला. राम मल्लेश दुर्गे (वय ४०) या मतदाराने मतदान प्रक्रियेदरम्यान ‘नगारा’ बटन दाबल्यानंतर अचानक भाजपच्या ‘कमळ’ चिन्हाचा दिवा लागल्याचा आरोप करत संतापाच्या भरात ईव्हीएम मशीन फोडून टाकली.

घटनेची माहिती पसरताच मतदान केंद्राबाहेर मतदारांनी गर्दी केली. संतप्त नागरिकांनी “भाजप मुर्दाबाद”चे जोरदार घोषणाबाजी सुरू केली. काही वेळासाठी मतदान प्रक्रियेलाच ब्रेक बसल्याने वातावरण तणावपूर्ण बनले.

घटनेची माहिती मिळताच उपविभागीय पोलीस अधिकारी रवींद्र जाधव, मुख्याधिकारी आशिष चव्हाण आणि ठाणेदार शिवाजी कदम यांनी पथकासह घटनास्थळी धाव घेतली. त्यांनी नागरिकांना शांत करण्यासाठी मध्यस्थी करून परिस्थिती नियंत्रणात आणली. पोलिसांनी ईव्हीएमची पंचनामा प्रक्रिया सुरू केली असून पुढील चौकशी सुरू आहे.

या घटनेमुळे गडचांदुरातील प्रभाग ९ मध्ये निवडणुकीचे तापमान आणखी वाढले आहे. मतदान केंद्राबाहेर अद्यापही तणावाचे वातावरण असून सुरक्षा वाढविण्यात आली आहे.