पथनाट्यातून विद्यार्थिनींचा मतदानासाठी प्रभावी जनजागृती संदेश

चांदा ब्लास्ट

 बल्लारपूर शहरातील गर्दीच्या ठिकाणी प्रभावी सादरीकरणे 

नगरपरिषद निवडणुका अवघ्या काही दिवसांवर येऊन ठेपल्या असताना बल्लारपूर शहरातील नागरिकांनी उत्साहाने व जबाबदारीने मतदान करावे, या उद्देशाने शुक्रवार, दिनांक 28 नोव्हेंबर 2025 रोजी एसएनडीटी महिला विद्यापीठाच्या बल्लारपूर आवाराच्या राष्ट्रीय सेवा योजना (रासेयो) विभागातर्फे मतदान जनजागृतीसाठी पथनाट्य सादरीकरणांचा व्यापक उपक्रम राबविण्यात आला.

या अंतर्गत बल्लारपूर शहरातील गांधी पुतळा चौक, आंबेडकर पुतळा, कादरीया मस्जिद परिसर, तसेच शहर बसस्थानक अशा गर्दीच्या आणि नागरिकांची वर्दळ असलेल्या महत्त्वाच्या ठिकाणी विद्यार्थिनींनी पथनाट्ये सादर केली. दैनंदिन कामानिमित्त शहरात फिरणाऱ्या नागरिकांना थांबून विचार करायला भाग पाडणाऱ्या या पथनाट्यांतून मतदानाचे संवैधानिक महत्त्व, लोकशाहीची मजबुती, प्रशासनातील आपला वाटा, तसेच ‘एक एक मत’ किती निर्णायक ठरू शकते याविषयी परिणामकारक संदेश देण्यात आला.

या प्रभावी सादरीकरणांत रासेयो स्वयंसेविका हर्षित पांडे, रेवता गोरे, नंदिनी बल्की, सुहानी पोईंकर, सुनयना नांग, वैष्णवी जुनघरे, पवित्रा देवतळे, सुहानी मोहिजे, पलक रावत, श्रावणी नंदुरकर, जानवी कुलमेथे, नव्या आरेपल्ली, देविका पेंदोर, रुशाली सोनेजी यांसह इतर विद्यार्थिनींचा सक्रिय सहभाग होता. उत्स्फूर्त संवाद, प्रभावी अभिनय आणि दमदार घोषणांमुळे नागरिकांच्या चर्चेतही या पथनाट्यांची रंगत राहिली.

या प्रसंगी एसएनडीटी महिला विद्यापीठ बल्लारपूर आवाराचे संचालक डॉ. राजेश इंगोले, सहायक कुलसचिव डॉ. बाळू राठोड आणि समन्वयक डॉ. वेदानंद अलमस्त यांनी विविध ठिकाणी भेट देऊन विद्यार्थिनींचे कौतुक केले. पथनाट्यांतील सादरीकरणांमुळे नागरिकांची उत्सुकता वाढली असून सामाजिक जबाबदारीची जाणीव अधिक दृढ होत असल्याचे त्यांनी सांगितले.

संपूर्ण उपक्रमाचे नियोजन आणि यशस्वी अंमलबजावणी रासेयो कार्यक्रम अधिकारी प्रा. श्रुतिका राऊत आणि प्रा. दीपिका उमरे यांच्या मार्गदर्शनाखाली करण्यात आली.

मतदानासाठी जनजागृती निर्माण करण्याचा हा उपक्रम शहरात सकारात्मक वातावरण निर्माण करीत असून येणाऱ्या निवडणुकीत नागरिकांचा सहभाग निश्चितच वाढेल, अशी अपेक्षा व्यक्त करण्यात आली.