सत्ता-समीकरणाचा प्रवास पुन्हा चर्चेत : नगरपालिकेचा २७ वर्षांचा प्रवास

चांदा ब्लास्ट प्रतिनिधी. अतुल कोल्हे

          भद्रावती नगरपरिषद निवडणूक २०२५ चे पडघम वाजू लागले.अवघ्या सहा दिवसांनि मतदान करायचे आहे.बैठकांना, प्रचाराला वेग येऊ लागला. चर्चेला पेव फुटू लागले.येत्या निवडणुकीत काय होणार याचा वेध घेण्याआधी भूतकाळ आणि वर्तमान काळातील घटनाचक्रांचे सिंहावलोकंन होणेही तितकेच आवश्यक ठरते.

ग्राम पंचायत बरखास्त झाली. १५ ऑगस्ट १९९८ ला न.प. भद्रावतीचा जन्म झाला. या . आज ही नगरपरिषद २७ वर्षांची झाली आहे .याच नगर परिषदेची ३० ऑगस्ट १९९८ ला पहिली सावत्रिक सार्वत्रिक निवडणूक पार पडली. ७ ऑगस्ट १९९८ ला पहिला नगराध्यक्ष विराजमान झाला.तेव्हापासून आजपर्यंत १० नगराध्यक्ष होऊन गेले.

१९९८ ची निवडणूक वार्ड निहाय लढल्या गेली. यावेळी पहिल्या नगराध्यक्ष पदाचा कार्यकाळ एक वर्षाचा होता. नंतर हा कार्यकाळ अडीच वर्षांचा झाला. या निवडणुकीत भाजप व सेना यांच्यात युती होती. एकूण २३ जागांसाठी झालेल्या निवडणुकीत शिवसेना सहा ,भाजपच्या ४, भारिप प्लस आरपीआय सहा, काँग्रेस तीन ,अपक्ष दोन, बसपा एक अशा प्रकारे पक्षीय बलाबल होते. भाजप व शिवसेना मिळून १० तसेच इतर चार नगरसेवक मिळून युतीची सत्ता स्थापन झाली. पहिला नगराध्यक्ष होण्याचा मान सुनील नामोजवार यांना मिळाला .अडीच वर्षाचा कार्यकाळ संपल्यावर ज्ञानेश्वर डुकरे नगराध्यक्ष झाले. त्यांचा कार्यकाळ अल्प ठरला. नंतर संजय वासेकर नगराध्यक्ष पदावर विराजमान झाले.

२००३ मध्ये झालेल्या सार्वत्रिक निवडणुकीत नगराध्यक्षपदाचा कार्यकाळ पाच वर्षाचा करण्यात आला. ही निवडणूक प्रभाग निहाय होऊन नागरिकांमधून नगराध्यक्ष निवडला गेला. आठ प्रभागात २६ उमेदवारांसाठी ही निवडणूक झाली. या निवडणुकीतही भाजप शिवसेना युती झाली होती. यात शिवसेना आठ, भाजपा ८, काँग्रेस पाच, भारिप चार व बसपा एक असे पक्षीय बलाबल होते .या निवडणुकीत शिवसेनेच्या सुनीता वरटकर नगराध्यक्षपदावर विराजमान झाल्या.

२००८ मधील निवडणुकीत नगराध्यक्ष पदाचा काळ पुन्हा अडीच वर्षावर आला. ही निवडणूक वार्ड निहाय झाली. एकूण २६ उमेदवार होते. शिवसेना १२, काँग्रेस ३, बसपा तीन ,भारिप दोन ,मनसे एक, स्वभाप एक, राष्ट्रवादी काँग्रेस दोन, भाजपा एक, अपक्ष एक असे पक्षीय बलाबल होते. या निवडणुकीत शिवसेना भाजपा युती नव्हती.

इतर पक्षांशी हात मिळवली करून शिवसेनेने या निवडणुकीत विजयाची हॅट्रिक साधली. शिवसेनेच्या सविता सूर यांना नगराध्यक्ष होण्याचा मान मिळाला. एका वर्षांनीच सरिता सूर यांच्यावर अविश्वास प्रस्ताव आणला गेला व तो पारितही झाला. नंतर शिवसेनेच्याच चंद्रकला आवारी नगराध्यक्ष झाल्या. यावेळी काँग्रेसचे दोन व वसपाचा एक उमेदवार फक्त विरोधात राहिले. पुढील अडीच वर्षात अनुसूचित जमाती महिला राखीव पदामुळे या प्रवर्गातील एकमेव महिला उमेदवार असलेल्या शिवसेनेच्या मीनल आत्राम नगराध्यक्ष झाल्या.

काही अटीतटीच्या लढती

आतापर्यंत झालेल्या नगरपरिषदेच्या सार्वत्रिक निवडणुकांमध्ये काही लढती अटीतटीच्या झाल्यात. ज्ञानेश्वर डुकरे व शंकर रासेकर यांच्यात नगराध्यक्ष पदाची निवडणूक झाली. यात ईश्वरचिठ्ठीने ज्ञानेश्वर डुकरे विजयी झाले. नगरसेवक पदासाठी झालेल्या निवडणुकीत अफजलभाई हे शामराव आमने यांचे विरुद्ध एका मताने विजयी झाले.

नगरपरिषदच्या दुसऱ्या सार्वत्रिक निवडणुकीत काँग्रेसचे अफजलभाई व काँग्रेसच्या चंद्रकला परोधे उपाध्यक्ष पदासाठी एकमेका विरोधात उभे होते. एकाला शिवसेनेचा तर एकाला भाजपचा पाठिंबा होता. यामध्ये चंद्रकला पारोधे निवडून आल्या. एकाच पक्षाचे दोन प्रतिस्पर्धी असल्याची कदाचित ही आत्तापर्यंतच्या न.प.निवडणुकीमध्ये पहिलीच घटना ठरली.