जिल्ह्यात नगरपरिषद निवडणुकीदरम्यान आठवडी बाजार बंद ठेवण्याचा आदेश

चांदा ब्लास्ट

राज्य निवडणूक आयोगाने जाहीर केलेल्या नगरपरिषद व नगरपंचायत सार्वत्रिक निवडणूक-२०२५ च्या कार्यक्रमानुसार चंद्रपूर जिल्ह्यातील बल्लारपूर, राजुरा, गडचांदूर, भद्रावती, वरोरा, चिमूर, ब्रम्हपुरी, नागभीड, मुल, घुग्गुस या नगरपालिकांसाठी तसेच भिसी नगरपंचायतीसाठी दि. २ डिसेंबर २०२५ रोजी सकाळी ७.३० ते सायं. ५.३० वाजेपर्यंत मतदान होणार आहे. तर दि. ३ डिसेंबर २०२५ रोजी सकाळी १० वाजेपासून मतमोजणी पार पडणार आहे. ४ नोव्हेंबर २०२५ पासून या निवडणूक क्षेत्रात आदर्श आचारसंहिता लागू आहे.

मतदान व मतमोजणीच्या दिवशी संबंधित नगरपरिषद व नगरपंचायत क्षेत्रात भरत असलेल्या आठवडी बाजारांमध्ये मोठी गर्दी होत असल्याने आदर्श आचारसंहितेचे पालन, कायदा-सुव्यवस्था आणि निवडणूक प्रक्रिया निर्विघ्न पार पाडण्यासाठी बाजार बंद ठेवणे आवश्यक असल्याचे जिल्हादंडाधिकारी यांनी नमूद केले आहे.

मार्केट अ‍ॅण्ड फेअर अ‍ॅक्ट, १८६२ चे कलम 5(अ) अन्वये जिल्हादंडाधिकारी तथा जिल्हाधिकारी यांना प्रदान करण्यात आलेल्या अधिकाराचा वापर करून जिल्हाधिकारी विनय गौडा जी.सी. यांनी मतदान दिवशी (दि. २ डिसेंबर २०२५ – मंगळवार) गडचांदूर येथे आठवडी बाजार येत असल्याने सदर आठवडी बंद ठेवण्यात येणार असून मतमोजणी दिवशी (दि. ३ डिसेंबर २०२५ – बुधवार) भद्रावती व मूल येथील आठवडी बाजार बंद ठेवण्यात येणार आहे.

हा आदेश दि. २७ नोव्हेंबर २०२५ रोजी जिल्हादंडाधिकारी विनय गौडा जी.सी. यांच्या स्वाक्षरीसह जारी करण्यात आला असून, सर्व संबंधितांनी आदेशाचे काटेकोर पालन करावे, असे आवाहन करण्यात आले आहे.