भारतरत्न डॉ. बाबासाहेब आंबेडकर भवन, गडचांदूर येथे वर्षावास समारोप सोहळा उत्साहात संपन्न

चांदा ब्लास्ट प्रतिनिधी. प्रा. अशोक डोईफोडे

गडचांदूर : भारतीय बौद्ध महासभा तालुका शाखा कोरपणा आणि भारतरत्न डॉ. बाबासाहेब आंबेडकर भवन, गडचांदूर यांच्या संयुक्त विद्यमाने आयोजित तीन महिन्यांच्या वर्षावास कालावधीचा समारोपीय सोहळा सोमवार, दि. 20 ऑक्टोबर 2025 रोजी येथील डॉ. बाबासाहेब आंबेडकर भवनात मोठ्या उत्साहात संपन्न झाला. हा वर्षावास कालावधी दि. 10 जुलै 2025 (आषाढी पौर्णिमा) ते दि. 7 ऑक्टोबर 2025 (आश्विन पौर्णिमा) या कालावधीत आयोजित करण्यात आला होता.

कार्यक्रमाच्या प्रारंभी, डॉ. बाबासाहेब आंबेडकर भवनापासून छत्रपती शिवाजी महाराज चौकातील डॉ. बाबासाहेब आंबेडकर यांच्या पूर्णाकृती पुतळ्यापर्यंत समता सैनिक दलाच्या नेतृत्वाखाली भव्य रॅली काढण्यात आली. या रॅलीत मोठ्या संख्येने बौद्ध उपासक-उपासिका, समता सैनिक दलाचे सैनिक आणि स्थानिक नागरिक सहभागी झाले होते. रॅलीनंतर समता सैनिक दलाच्या वतीने डॉ. बाबासाहेब आंबेडकर यांच्या पुतळ्याला मानवंदना देण्यात आली.

यानंतर मुख्य कार्यक्रमाला सुरुवात झाली. या कार्यक्रमाच्या अध्यक्षस्थानी बौद्धाचार्य आणि भारतीय बौद्ध महासभेचे तालुका अध्यक्ष आयु. श्रावण बुधाजी जिवणे होते. प्रमुख मार्गदर्शक म्हणून भारतीय बौद्ध महासभेच्या महाराष्ट्र राज्य संघटक आणि केंद्रीय शिक्षिका आयुनि. कैविशताई मेश्राम, चंद्रपूर जिल्हा अध्यक्ष आणि केंद्रीय शिक्षक आयु. किशोरभाऊ तेलतुंबडे, भारतीय बौद्ध महासभा जिल्हा शाखेचे कोषाध्यक्ष आणि समता सैनिक दलाचे लेफ्टनंट कर्नल आयु. गुरूबालक मेश्राम, जिल्हा शाखेचे संस्कार विभागाचे सचिव आयु. शेषराव सहारे, जिल्हा शाखेचे संघटक आयु. कृष्णदास गजभीये, ॲडव्होकेट आयु. संजय निरंजने, प्राचार्य डॉ. सोमाजी गोंडाणे, आयु. कवडूजी सोनडवले, प्रा. आयुनि. माधुरीताई ऊके, आयु. कविकर निरंजने, तालुका शाखेचे कोषाध्यक्ष आणि बौद्धाचार्य आयु. उत्तम परेकर, तालुका शाखेचे सरचिटणीस आयु. गिरीष पाझारे आणि समता सैनिक दलाचे युनिट लीडर तसेच तालुका शाखेचे संरक्षण विभागाचे उपाध्यक्ष आयु. बादल चांदेकर यांनी उपस्थितांना मोलाचे मार्गदर्शन केले.

कार्यक्रमाचे प्रास्ताविक भारतीय बौद्ध महासभा गडचांदूर शहर शाखेचे अध्यक्ष आयु. पद्माकरजी खैरे यांनी केले. सूत्रसंचालन शहर शाखेचे सरचिटणीस आयु. राहुल निरंजने यांनी केले, तर आभार प्रदर्शन समता सैनिक दलाच्या सैनिक आयुनि. सिमाताई खैरे यांनी केले. या कार्यक्रमाचे मुख्य आयोजक समता सैनिक दलाच्या सैनिक आयुनि. आशाताई सोनडवले यांच्यासह सर्व सैनिक, डॉ. बाबासाहेब आंबेडकर भवनातील उपासक-उपासिका आणि भारतीय बौद्ध महासभेच्या सक्रिय पदाधिकाऱ्यांनी अतिशय मेहनत घेऊन हा कार्यक्रम यशस्वी केला.