बॉम्बेझरी येथे सेंद्रिय शेतीला प्रोत्साहन देण्यासाठी महिलांना बियाणांचे वाटप

चांदा ब्लास्ट प्रतिनिधी. प्रा. अशोक डोईफोडे

माणिकगड अल्ट्राटेक सिमेंट लिमिटेडच्या सीएसआर (कॉर्पोरेट सामाजिक जबाबदारी) विभागाच्यावतीने आज बॉम्बेझरी गावात सेंद्रिय शेतीला प्रोत्साहन देण्यासाठी एक विशेष कार्यक्रम आयोजित करण्यात आला. या उपक्रमाअंतर्गत गावातील २५ महिलांना मिरची, वांगी, वाल, बरबटी, मेथी, पालक, कारली आणि टोमॅटो यांसारख्या मुख्य भाजीपाला बियाण्यांचे वाटप करण्यात आले.

हा कार्यक्रम युनिट हेड श्री. अतुल कंसल, वरिष्ठ उपाध्यक्ष श्री. मुकेश गेहलोत, आणि ईआर हेड श्री. नवीन कौशिक यांच्या मार्गदर्शनाखाली पार पडला. त्यांच्या नेतृत्वामुळे व प्रेरणेमुळे हा उपक्रम यशस्वीरीत्या राबवता आला.

या कार्यक्रमाचा उद्देश ग्रामीण महिलांना त्यांच्या घराच्या आवारात किंवा शेतात सेंद्रिय पद्धतीने भाजीपाला पिकवण्यासाठी प्रेरित करणे हा होता, जेणेकरून त्यांना आणि त्यांच्या कुटुंबियांना ताज्या व पौष्टिक भाज्यांचा नियमित पुरवठा होऊ शकेल आणि ते स्वयंपूर्ण बनतील.

कार्यक्रमादरम्यान महिलांना बियाणे कसे पेरायचे, सेंद्रिय पद्धतीने शेती कशी करायची याचे प्रशिक्षण देण्यात आले. याशिवाय, कमी क्षेत्रात घरगुती वापरासाठी शेती केल्यास होणारे आरोग्यदायी फायदेही स्पष्ट करण्यात आले. हा उपक्रम आरोग्य, पोषण आणि पर्यावरण रक्षणाच्या दृष्टिकोनातून महत्त्वपूर्ण आहे.

गावातील महिलांनी या उपक्रमात उत्साहाने सहभाग घेतला आणि कार्यक्रम यशस्वी केला. त्यांनी माणिकगड अल्ट्राटेक सिमेंट लिमिटेडच्या CSR टीमचे मनापासून आभार मानले व भविष्यातही असेच कार्यक्रम राबवावेत अशी मागणी केली.

भविष्यातील योजनेंतर्गत, कंपनीकडून लवकरच इतर दोन गावांमध्येही अशाच प्रकारचे बियाणे वितरण कार्यक्रम राबवले जाणार आहेत, ज्यायोगे अधिकाधिक ग्रामीण कुटुंबे सेंद्रिय शेतीशी जोडली जातील व स्वावलंबी बनतील.

ही संपूर्ण मोहीम ग्रामीण विकास, महिला सक्षमीकरण आणि पर्यावरण संवर्धनाच्या दिशेने एक अनुकरणीय पाऊल मानले जात आहे