विदर्भ महाविद्यालयात विविध उपक्रमाचे आयोजन
राष्ट्रीय सेवा योजना सप्ताह व राष्ट्रीय क्रीडा दिनानिमित्त
चांदा ब्लास्ट प्रतिनिधी.संतोष इंद्राळे
जिवती :- विदर्भ कॉलेज ऑफ आर्ट्स, कॉमर्स अँड सायन्स, जिवती येथील राष्ट्रीय सेवा योजना, क्रीडा व शारीरिक शिक्षण, आणि महिला सक्षमीकरण विभागातर्फे राष्ट्रीय सेवा योजना सप्ताह तसेच मेजर ध्यानचंद जयंती निमित्त राष्ट्रीय क्रीडा दिवस उत्साहात साजरा करण्यात आला. या निमित्ताने आरोग्य, संस्कृती, स्वदेशी व स्त्रीशक्ती या विषयांवर विविध उपक्रम राबविण्यात आले.
सप्ताहाची सुरुवात गणेश उत्सवाच्या पार्श्वभूमीवर पर्यावरणपूरक गणेशोत्सव साजरा करण्याचे महत्त्व पटवून देत मातीच्या मूर्तींचा वापर करण्याचा संदेश देण्यात आला. त्याचबरोबर स्वदेशी, स्थानिक उद्योग, हस्तकला व उत्पादने यांचा वापर करण्याचा सल्ला देण्यात आला . या मोहिमेतून युवकांना रोजगार निर्माण व्हावा. ऑपरेशन सिंदूर या अभियानाचे महत्व,महिला सक्षमीकरणावर भर देण्यात आला. स्त्रीशक्तीचा गौरव करत महिलांचे समाजातील स्थान, त्यांची सुरक्षितता आणि शिक्षण यावर व्याख्यान आयोजित करण्यात आले.
महिलांना आत्मनिर्भरतेकडे वाटचाल करण्यासाठी प्रोत्साहित करण्यात आले. सप्ताहाचा शेवट हॉकी चे जादुगार मेजर ध्यानचंद यांच्या जयंती व राष्ट्रीय क्रीडा दिवस निमित्त एकदिवसीय आरोग्य शिबीराने झाला. या शिबिरात विद्यार्थ्यांची आरोग्य तपासणी करण्यात आली. तसेच त्यांना रोगप्रतिबंधक उपाय, स्वच्छतेचे महत्त्व व संतुलित आहाराचे मार्गदर्शन करण्यात आले. स्थानिक वैद्यकीय अधिकाऱ्यांनी मोफत तपासणी व औषधोपचार सेवा उपलब्ध करून दिली.
कार्यक्रमाचे अध्यक्षस्थान प्राचार्या डॉ. शाक्य यांनी भूषविले. त्यांनी आरोग्य संवर्धन, पर्यावरण संरक्षण, स्वदेशीचा अंगीकार व स्त्रीशक्तीचा गौरव हीच खरी राष्ट्रीय सेवा असल्याचे सांगितले. प्रमुख मार्गदर्शक डॉ. श्रीकांत पानघाटे यांनी आत्मनिर्भर भारत आणि ऑपरेशन सिंदूर या उपक्रमावर विस्तारपूर्वक भाष्य केले. वैद्यकीय अधिकारी डॉ. जाधव साहेब यांनी सुदृढ आरोग्य व त्याची काळजी या बाबत विवेचन केले. यावेळी डॉ. गजानन राऊत, प्रा. संजय देशमुख, डॉ. परवेज अली, प्रा. गणेश कदम मंचावर उपस्थित होते.
कार्यक्रम अधिकारी प्रा. सचिन यनगंदलवार यांनी प्रास्ताविक केले, कार्यक्रमाचे संचालन क्रीडा विभाग प्रमुख प्रा. राहुल सदूलवार तर आभार प्रदर्शन डॉ. वैशाली डोर्लीकर महिला सक्षमीकरण कक्ष यांनी मानले. कार्यक्रम यशस्वी करण्यासाठी महाविद्यालयातील सर्व शिक्षक व शिक्षकेत्तर कर्मचारी यांनी मोलाचे सहकार्य केले.
