चंद्रपूरचांदाब्लास्ट विशेषविदर्भ

धानाला किमान साडेतीन हजार रुपये भाव द्या – राजु झोडे

धानाच्या अत्यल्प दरामुळे शेतकरी चिंतातूर ; धानाला भाव देऊन शेतकऱ्यांना आधार देण्याची झोडे यांची मागणी

चांदा ब्लास्ट प्रतिनिधी. संजय पडोळे

चंद्रपूर जिल्ह्यातील पूर्व भागातील तालुक्यात मोठ्या प्रमाणात धानाचे पीक घेतले जाते. मागील दहा वर्षापासून धानाला अत्यल्प भाव आहे त्यामुळे धानाची शेती करणाऱ्यां शेतकऱ्यांना शेती करणे परवडेनासे झाले आहे. त्यामुळे किमान धानाला साडेतीन हजार रुपये भाव देण्याची मागणी उलगुलान संघटनेचे अध्यक्ष राजू झोडे यांनी शासन व प्रशासनाकडे केली.
शेती करण्यासाठी लागणारे बियाणे, खते, कीटकनाशके यांचे दर गगनाला भिडलेले असून महागाईचे प्रमाण अव्वाच्या सव्वा वाढलेले आहे. मजुरीचे दर चार पटीने वाढलेली असून विद्युत व पेट्रोल-डिझेलच्या वाढलेल्या किमतीमुळे शेतकऱ्यांना शेती करताना प्रचंड आर्थिक ताण सहन करावा लागत आहे.महागाईचे प्रमाण मोठ्या प्रमाणात वाढले असताना धानाला मागील दहा ते पंधरा वर्षापासून एकच भाव मिळत आहे.उत्पन्नापेक्षा उत्पादनाला लागणारा खर्च अधिक होत असल्यामुळे शेतकरी मोठ्या आर्थिक टंचाईचा सामना करत आहे. शेती करावी की सोडून द्यावी अशा दुय्यम मनस्थितीत आजचा धान पिकविणाऱ्या शेतकऱ्यांची अवस्था आहे. सरकार व येथील लोकप्रतिनिधी शेतकऱ्यांच्या मूलभूत प्रश्नाकडे हेतूपुरस्पर दुर्लक्ष करताना दिसत आहेत. सध्याच्या परिस्थितीत धान उत्पादक शेतकर्‍यांचा कोणीही वाली नाही असे चित्र दिसून येत असून धान उत्पादक शेतकरी नैराश्याच्या वाटेवर आहे. सरकारने व प्रशासनाने याचा गांभीर्यपूर्वक विचार करून धानाला किमान साडेतीन हजार रुपये प्रतिक्विंटल भाव द्यावा व शेतकऱ्याला नैराश्यातून व आर्थिक संकटातून वाचवावे अशी मागणी उलगुलान संघटनेचे अध्यक्ष राजू झोडे यांनी शासन दरबारी केली.
निवेदन देताना संघटनेचे अध्यक्ष राजु झोडे, मुल तालुकाध्यक्ष रोहित बोबाटे, सुजित खोब्रागडे, आकाश दहिवले, किशोर पगडपल्लीवार, अनिल नाहगमकर, रोहित रायपुरे, अवि मोहुर्ले, संतोष कारमवार तथा उलगुलान संघटनेचे अन्य पदाधिकारी व कार्यकर्ता उपस्थित होते.

Related Articles

Leave a Reply

Your email address will not be published.

Back to top button