लसीकरणापासून वंचित राहिलेल्या लाभार्थ्यांसाठी विशेष मिशन इंद्रधनुष्य ५.०

चांदा ब्लास्ट

लसीकरणापासून वंचित राहिलेल्या लाभार्थ्यांसाठी विशेष मिशन इंद्रधनुष्य ५.० चा तिसरा टप्पा उद्या ९ ते १४ ऑक्टोबर दरम्यान राबविला जाणार असुन यात शून्य डोज घेतलेले, सुटलेले व वंचित लाभार्थी क्षेत्र, गोवरसाठी अतिजोखमीचा भाग, नवीन लसीअंतर्गत कमी काम झालेले क्षेत्र, नियमित लसीकरण सत्र न झालेले क्षेत्र, स्थलांतरित भागातील लाभार्थ्यांचे लसीकरण करण्यात येणार आहे.

    बालकांमधील मृत्यू व आजारपणाचे प्रमाण कमी करण्यासाठी लसीकरण हे एक प्रभावी साधन असून, अर्धवट लसीकरण झालेले, तसेच लसीकरण न झालेली बालके ही पूर्ण लसीकरण झालेल्या बालकांपेक्षा लवकर आजारी पडतात किंवा मृत्यू पावतात त्यामुळे केंद्र शासनाने डिसेंबर २०२३ पर्यंत गोवर रूबेला आजाराचे दुरीकरण करण्याचे ध्येय निश्चित केले असून, यासाठी चंद्रपूर महानगरपालिका क्षेत्रात ऑगस्ट महिन्यापासून विशेष मिशन इंद्रधनुष्य ५.० चंद्रपूर मनपातर्फे राबविण्यात येत आहे.

    यासंदर्भात सिटी टास्क फोर्स समितीची आढावा बैठक ५ ऑक्टोबर रोजी अतिरिक्त आयुक्त चंदन पाटील यांच्या अध्यक्षतेखाली मनपा सभागृहात घेण्यात आली.याप्रसंगी डॉ. वनिता गर्गेलवार,डॉ. साजिद, आयएमए व आयएपीचे प्रतिनिधी उपस्थीत होते. विशेष मिशन इंद्रधनुष्य ५.० या मोहिमेंतर्गत झीरो ते दोन वर्ष वयोगटांतील लसीकरणापासून वंचित किंवा गळती झालेल्या लाभार्थ्यांचे सर्व लसींद्वारे लसीकरण करण्यात येणार आहे. दोन ते पाच वयोगटांतील ज्या बालकांचे गोवर रूबेला लसीचा पहिला व दुसरा डोस राहिला असेल, तसेच डीपीटी व ओरल पोलिओ लसीचा बूस्टर डोस राहिला असेल त्यांचेही लसीकरण करण्यात येत आहे. त्याचबरोबर गर्भवती महिला यांचे लसीकरण कार्यक्रमांतर्गत करण्यात येत असुन ६ ऑगस्ट २०१८ किंवा त्यानंतर जन्मलेल्या बालकांचा यामध्ये समावेश करण्यात आला आहे.

       मिशन इंद्रधनुष्यकरिता मनपा आरोग्य विभागामार्फत ७० लसीकरण केंद्रे व ६ मोबाईल टीम तयार करण्यात आल्या असून आपली बालके निरोगी व सुदृढ राहण्यासाठी नियमित लसीकरण करणे गरजेचे असल्याने कोणतेही बालक लसीकरणापासून वंचित राहू न देण्याचे आवाहन चंद्रपूर महानगरपालिका आरोग्य विभागाकडून करण्यात येत आहे

.