बेकायदा पार्किंगचा ‘धोकादायक खेळ’ सुरूच! घुग्घूस-वणी मार्गावर 18 चाकी ट्रक उलटला
मोठी दुर्घटना टळली, जबाबदार कधी जागे होणार?
चांदा ब्लास्ट
घुग्घूस, चंद्रपूर : घुग्घूस-वणी मार्गावरील बेकायदा पार्किंगचा प्रश्न दिवसेंदिवस गंभीर होत चालला असून प्रशासनाच्या दुर्लक्षामुळे गुरुवार, दि. 30/07/2026 रोजी मोठी दुर्घटना घडण्याची वेळ आली. रस्त्याच्या कडेला बेकायदा उभ्या असलेल्या वाहनांदरम्यान एक 18 चाकी ट्रक उलटल्याची घटना घडली. सुदैवाने या अपघातात कोणतीही जीवितहानी झाली नाही, मात्र या घटनेमुळे रस्ते सुरक्षेवर गंभीर प्रश्नचिन्ह निर्माण झाले आहे.
प्रत्यक्षदर्शींनी दिलेल्या माहितीनुसार, ज्या ठिकाणी ट्रक उलटला त्या ठिकाणी नगर परिषदेची सांडपाणी वाहिनी (वेस्टेज वॉटर पाइपलाइन) आणि नाली असल्याचे समोर आले आहे. त्यावेळी रस्त्यावर पादचारी किंवा दुचाकीस्वारांची वर्दळ असती, तर हा अपघात जीवघेणा ठरू शकला असता.
सर्वात मोठा प्रश्न असा उपस्थित होत आहे की, या मार्गावरील बेकायदा पार्किंगबाबत सातत्याने तक्रारी होत असतानाही प्रादेशिक परिवहन कार्यालय (RTO), वाहतूक पोलीस आणि नगर प्रशासनाकडून ठोस कारवाई का होत नाही? रस्ते सुरक्षा आणि वाहतूक नियमांच्या अंमलबजावणीचे मोठे दावे केले जात असताना ही घटना संबंधित विभागांच्या कार्यपद्धतीवर गंभीर प्रश्न उपस्थित करत आहे.
स्थानिक नागरिकांच्या म्हणण्यानुसार, घुग्घूस-वणी मार्गावरील बेकायदा पार्किंगमुळे नेहमीच अपघाताचा धोका निर्माण होत असतो. तरीही नियमित कारवाई होत नाही, तसेच या समस्येवर कायमस्वरूपी तोडगा काढण्यासाठी कोणतीही ठोस उपाययोजना करण्यात आलेली नाही.
दरम्यान, या अपघाताबाबत संबंधित विभागाकडून अद्याप कोणतीही अधिकृत माहिती किंवा निवेदन जारी करण्यात आलेले नाही. मात्र, या घटनेनंतर परिसरात अशी चर्चा सुरू झाली आहे की, RTO, वाहतूक पोलीस आणि नगर प्रशासनाने वेळेत कठोर पावले उचलली नाहीत, तर भविष्यात याहून मोठी दुर्घटना घडू शकते.
स्थानिक नागरिकांनी प्रशासनाकडे बेकायदा पार्किंगविरोधात तातडीने कठोर कारवाई करून रस्ता सुरक्षित करण्याची मागणी केली आहे, जेणेकरून भविष्यात अशा घटनांची पुनरावृत्ती होणार नाही.
